Pynsangeh ka NEIGRIHMS ban thungkam lyngba ka NORCET Ba pyrshah jur ka HYC

Ka North East Indira Gandhi Regional Institute of Health and Medical Science (NEIGRIHMS) ka la pynsangeh shwa ia ka jingthung kam lyngba ka Nursing Officer Recruitment Common Eligibility Test (NORCET). Ia kane ka rai la pynbna da u Director ka NEIGRIHMS u Dr. Nalin Mehta ha ka jingialang bad ka seng Hynniewtrep Youth Council (HYC) hapoh ka kamra treikam jong kane ka Hospital. Haba pyntip ia kane, u President ka HYC u Bah Roy Kupar Synrem ula iathuh ba ka jingpynsangeh noh ia ka jingthung kam ia ki Nursing Officer lyngba ka NORCET ka dei namar ka wanrah ia ka jingduhnong ia ki samla trai Ri trai muluk. U Bah Roy ula pyntip ba dang shen ki la don 222 ngut kiba la thep kam bad na kine, 201 ngut dei shynrang bad 21 ngut ki dei ki kynthei hynrei ki don tang 14 ngut napoh Meghalaya kiba ioh kam.”Namar ka don shisha ka jingduh nong iaki samla trai Ri, naka liang u Director ka NEIGRIHMS ula mynjur bad u la kular ban pynsangeh shuwa ia kane ka Exam” la ong u Bah Roy.

U Bah Roy ula iathuh ba haka jingialang, ka Seng kala iakren ruh bad u Director halor ka jing Outsourcing iaki kam bapher bapher kum ka kam Security, Ward Boy, Ward Girl, Cleaner bad kiwei kiwei. Ula iathuh ba ka seng kala kren shai ha u Director ba ka NEIGRIHMS kadei ban ai shaki Agency lane ki Outsourcing Agency napoh Meghalaya naka bynta kum kine ki kam.U President ka HYC ula pyntip ba ha kane ka jingkynduh, ki la don ki mat kiba la urlong bad ki don ki mat ki bym pat urlong namar ka donkam ia ka jingmynjur na ka Ministry jong ka Sorkar Pdeng. Haba iadei bad ka bhah kam kyrpang, bah Roy ula ong ba ka Seng kala dawa naka NEIGRIHMS ban thung 80 percent ia ki trai jylla haki ba hap Group B Bad C bad naka liang u Director ula pyntip shaka Seng baka Hospital ka bud ia ka Office Memorandum kata ban pynrung 44 percent ia ki trai Jylla.

“Haba iadei bad ki mat ba khlem pat lah u Director ka NEIGRIHMS ban ai jingmynjur, naka liang ka HYC kan sa phah da ka shithi sha ka Ministry ka Sorkar Pdeng” ula ong.U bah Roy Kupar Synrem u la iathuh ba kiba bun hi ki Nurse shynrang kidei kiba wan nabar bad na ka liang ka HYC ka la bthah ia u Director ba un pynbeit thymmai ia ka jingthung Nurse kumba 80 percent na ka bynta ki kynthei bad 20 percent na ka bynta ki shynrang.Ula ong baka seng kala dawa ba tad haduh ba la pynbeit ia kane, ka Hospital ruh kadei ban pynthikna ban nym pat don kano kano ka jingthung kam ia ki Nurse.