Ka National Institute of Fashion Technology (NIFT), Shillong ka la pynlong ia ka prokram kaba 3 sngi naduh ka 31 tarik Naitung haduh 2 tarik Nailar, 2024 na ka bynta ka batch ba thymmai jong kumba 170 ngut ki samla pule ha ki jingpule Undergraduate kaba saw snem bad Post Graduate 2 snem. Kumba long ka rukom, ka jingthmu jong ka prokram ka long ban pynsngew ia ki samla ba wan pule thymmai ha kane ka jaka ai jinghikai shaphang ki tnad bad ki jinghikai, ki lad kiba don, ki nonghikai bad kiwei kiwei ki kam. U Shankar Jha, Director, NIFT Shillong ula ai jingkren ia ki samla pule ba dang wan thymmai da kaba pdiang sngewbha ia ki ha ka sngi plie ia ka prokram.
Mynta, ka NIFT Shillong ka pyniaid ia ki jingpule undergraduate Bachelor of Design (B.Des) ba saw snem ha ka Fashion & Lifestyle Design, Fashion Design, Fashion Communication, Textile Design, bad ki jingpule postgraduate Master of Fashion Management (MFM) ba ar snem . Ka NIFT mynta ka don 19 tylli ki Campus ha kylleng ka ri, bad ka NIFT Shillong kadei tang kawei ka Campus kaba don ha ka thain shatei lammihngi jong ka ri. Katto katne ki seat la mang, ha man ka tnat jong ka NIFT Shillong na ka bynta ki samla pule jong 8 tylli ki jylla ka thain shatei lammihngi, ba lait na ki seat na ka bynta ki SC ST ha India. La antad ba ki samla na kine ki 8 tylli ki jylla kin shim ia kane ka lad ba kin kiew shaphrang. La ai haduh shispah percent ka skhim Sarthak Scholarship na ka bynta ka jinglut jingsep bai pule, kaba ai ha man u semester da ka NIFT ia ki samla pule kiba wan na ki longiing ba kham duna ka ioh ka kot ki lah ban ioh da kaba pynbiang ia ki jingdonkam.
Ka National Institute of Fashion Technology kadei ka institute ba hakhlieh ha ka ri ha ka jingpule fashion, design and technology, innovation bad retail, bad ia ka jinghikai bad ka rukom ai jinghikai la saindur ha kata ka rukom ba ki samla pule ki long kiba la pynkhreh ban mad ia ki jingeh bad ka kam kaba bun ki jingialeh. Ki samla pule ha NIFT Shillong ki dei kiba wan na kylleng ka ri bad ki don ia ka deiriti bad ki nongrim kiba iar.
