Kum shibynta ka World Day Against Child Labour, hynne ka sngi ka ophis jong ka District Legal Services Authority, West Jaintia Hills District ryngkat ka jingiatreilang ka ophis Deputy Labour Commissioner bad ka ophis BDO Thadlaskein C&RD Block Thadlaskein, West Jaintia Hills kila pynlong ka jingpynsngewthuh paidbah halor ka hok jong ki khynnah ba hapoh 14 snem ka rta, ba ymbit ban phah pyntrei iaki ha kano kano ka jait kam.U Legal Aid counsel u R. Lyngdoh haba kren pynsngewthuh halor ka phang “Child Labour (Prohibition & Regulation)Act 1986” ula batai pynshai haba ia dei bad kane ka aiñ kaba khang pyrshah iaki khynnah ban trei ban ktah hapoh jongno jongno bad lada lap iaki nongpyntrei kumjuh ki kmie ki kpa ba ai lad iaki khun ban trei kin sa shah pynshitom katkum ka aiñ ha ryngkat ka shah daiñ kuna.
Ka Labour Inspector West Jaiñtia Hills District kong B.Toi haba kren ka iathuh baka sorkar kala pynkup bor iaka tnat treikam jong ki ban peitngor lada don kiba phah pyntrei daki khynnah ba hapoh 14 snem ka rta, kin pynngat aiñ iaki trai nongpyntrei, bad ai jingiada pat iaki khynnah.Ka daw ba khanglad namar ba ki dang dei haka rta ban pule puthi bad ruh namar ba kin sa shah ktah haka bor met, haka bor pyrkhat pyrdaiñ bad kiwei.Kumta ka kyntu iaki kmie ki kpa ba watla hapdeng ka jingduk ruh dei ban duriap pynleit skul iaki khun khnang ba kin kiew haka longbriew manbriew kumba ka sorkar ruh kala pynbiang iaki skul ha man ki shnong ki thaw nalor ka jingbam sngi.
Kala bynrap ruh da kaba ong dei tang ka pule puthi hi kaba lah ban khanglad iaka jingduk namar shisien bala don ka pule puthi wat lada wym ioh kam sorkar ruh hynrei la tip la shemphang hi ban wad daki kam ba kham biang.Naka liang ka Secretary District Legal Services Authority B. Majaw, MJS, haba pynsngew ba don ki skhim jingiarap naka bynta kito ki khynnah bym iohlad leit skul, kala bynrap ruh halor ka jingdonkam ban ai jingiada iaka hok ki khynnah da kaba kyntu iaki kmie ki kpa ba kin pynshlur iaki khun ban leit skul bad ruh ban leit mih sha ophis jong ka District Legal Service Authority ha Khlihetyrshi khnang ban ioh shuh shuh ki jingtip ba bniah.Ha ka jingialang bala pyniaid daka S.M Saioo Legal Aid Counsel ha hall ka Thadlaskeiñ C&RD Block, la donlang ruh ka Violet Rose Talang, Junior Development Officer, Thadlaskein C&RD Block office bad kiwei.
