Ka Hima Khatarlyngdoh hapoh ka Nongpoh Ekaka Sordarship mynta ka sngi ka la ioh ban pynspong ia u Rangbah Shnong bad Secretary Shnong ka Shnong Saiden. Wat la ka Dorbar Shnong Saiden, ka la dep ban jied ia ki Rangbah Shnong, Secretary Shnong lem bad ki dkhot ka Executive Committee mynta la palat shisnem, hynrei dei ha ka 2 tarik Risaw ba kum ka Dorbar Shnong ka la ioh ia ka jingpynspong ba pura lyngba ka Hima Khatarlyngdoh kata hadien ka jingiapynbeit lang da ka EC jong ka Dorbar Shnong Saiden. Ha kane ka sngi ia u Rangbah Shnong Bah EK Lapang, la pynspong da u Myntri ka Hima Khatarlyngdoh Bah Stoiñ Syngkli, bad ia u Secretary Shnong Bah Evansis Jones Myrthong la pynspong da u Myntri H Namsaw bad ruh la pynithuh ia ki dkhot ka EC jong ka Dorbar Shnong Saiden. Ka Dorbar Shnong Saiden, ka la pynkup burom ruh ia u Samla Donkupar Kharlukhi, u samla ba la pyndep ia ka jingpule Pastor. Haba kren ha kane ka sngi, u Bah Stoiñ Syngkli, kum u wei na ki Myntri ka Hima Khatarlyngdoh hapoh ka Nongpoh Ekaka Sordarship, u la ai ka jingkhublei kaba kyrpang ia ka Dorbar Shnong Saiden kaba la pdiang ia ki nongialam ka Hima ban ioh ban pyndep ia ka bynta ka rukom ban pynspong jainspong ia u Rangbah Shnong bad u Secretary Shnong katkum ka riti dustur jong ka Hima.
U la pynpaw ruh, ba ka kam nongialam shnong ka dei ka kam kaba kyntang ym ka kamkai, kumta kum ki nongialam shnong ki dei ban shim ia ka jingkitkhlieh ban ialam ia ki nongshong shnong lem bad ka jingtreishitom ban kyntiew ia ka shnong ka thaw ha baroh ki liang kata naduh ka roi ka par bad kiwei kiwei.”Kane ka kam ban jied ia ki Rangbah Shnong la ithuh kyrpang ruh da ka Khasi Hills Autonomous District Council kum kita ki nongialam shnong katkum ka kyndon ain jong ka KHADC, kaba ai bor bad teh ruh ia ki Rangbah Shnong ban pyniaid ia ki kam shnong kam thaw hi baroh kawei”, ong u Bah Syngkli da kaba kitbok kitrwiang ruh ia ka shnong ka thaw ban nang roi nang par na kawei ka snem sha kawei pat. Na ka liang u Bah EK Lapang, kum u Rangbah Shnong u la pynpaw ia ka jingkmen bad ka jingmyllung mynsiem ba ki paidbah nongshong shnong ka Saiden hi ki don ia ka jingiatylli bad ka jing shaniah kaba skhem ha u kum u nongialam shnong kumta u la kular ruh ban nang bteng ia ka kam shakri hapoh ka shnong ka thaw, ban kyntiew ia ka shnong bad ruh ban ia treilang ruh na bynta ban rad dyngkhong ia ki jingsniew kiba shyrkhei kum u drug bad kiwei kiwei.
Ha kane ka sngi, kaba dei ruh ka jingrakhe ia ka Gandhi Jayanti, na ka liang ka Dorbar Shnong Saiden ka la ioh ruh ban rakhe ia kane ka sngi, da ka jingia mih paidbah ban pynkhuid ia ki sawdong sawkun jong ka shnong hi baroh kawei.
