Ki kynhun nongsam khaw rashon hapoh ka East Khasi Hills District hynne ka sngi kila mih jyndat naka jingialang bala pynlong daka tnat Supply ka Sorkar Jylla ha State Central Library Shillong ban hikai pyntbit halor ka rukom sam khaw Rashon sha ki paidbah.
Kane ka jingmih jyndat kadei ban pynpaw ka jingpyrshah iaka jingbym ban lah pynshai ki nonghikai pyntbit ka tnat Supply iaki jingkylli jong ki nongsam khaw Rashon bad ruh ban pyni iaka jingpyrshah iaka jingbthah ka tnat ban pyndonkam daka jingthew thymmai ka E-Scale hala ki dukan sam khaw Rashon sha ki paidbah.
Haba kren sha ki lad pathai khubor u dkhot ka Fair Price Shop Dealer Association u Bah Danny Langstieh ula iathuh ba kum ki nongsam khaw Rashon kim lah ban pdiang iaka jingbthah ka tnat Supply ka Sorkar Jylla namar u khaw udei bala wanrah na bar ka Jylla bad tad haduh bala pynpoi shaki dukan, ka jingkhia kilo u khaw ruh kala nang duna namar ka jinglait ei haka por pynkit.
U Bah Danny ula iathuh ba u khaw rashon u ban pynpoi sha ki dukan ban sam shaki paidbah, udei ban don beit iaka 50 kilo hynrei tad haduh ban da poi shaki dukan, u khaw u duna iaka 50 kilo.
“U Khaw byrni ba ki pynpoi shaki dukan naki kudam, um ju don iaka 50 kilo kumba udei ban don hynrei u don ba poi tang 43 kilo, 44 kilo bad kane kadei namar ka jingpei ki byrni” la kynnoh u Bah Danny.
U Bah Danny ula kyntu iaka tnat Supply ka Sorkar Jylla ba kadei ban thew shwa ia u khaw byrni hashuwa ban pynpoi shaki dukan ban pynthikna, la u don ne em 50 kilo, ne u duna namar ki nongsam khaw rashon ruh ki hap beit ban sam shaki paidbah katkum ka hok ba kidei ban ioh.
Naka liang u Bah Richard Khongwir ula ong baka jingtyrwa ka Sorkar ban pyntreikam daka jingthew thymmai ka E-Scale ban sam khaw rashon shaki paidbah ka long kaba biang tam hynrei ka tnat Supply kadei ban pynthikna shwa ba u khaw uba poi shaki dukan, udei ban biang kilo.
