Pyntip ha ki pulit lada shah dawa pisa, ha ka HNLC bad GNLA:DGP

U Director General ki Pulit ka jylla u Dr. LR Bishnoi hynne ka sngi ula ong, ba ki pulit ka jylla ki la ioh jingtip bun ki riew paidbah ki la ioh shithi dawa pisa na ka seng lehnoh Hynniewtrep National Liberation Council (HNLC) bad na ka Garo National Liberation Army (GNLA) lyngba ki social media bad ki WhatsAp, Telegram bad SMS. U la ong, ki paidbah ki dei ban sngewthuh ba ym donkam ban kyrshan ne ai pisa ia ki kynhun ne seng ba la shah niew be-ain ha ka sorkar, kum kine ki jingiarap ki long pyrshah bad ki buh ia ka jingim jong ki paidbah ba lui lui ha ka jingma.

Ka jingkyrshan pisa ia ki kynhun ba la shah niew beain kam dei tang ba pynkhein ia ki kyndon ain hynrei ka dei ka jingkhien dewthala ban iakhun pyrshah ia ki kam beain. Halor kane na ka liang jong ka tnad pulit ka la pynshai bad kyntu ia ki paidbah ban kiar na ka jingsiew pisa sha ki seng lehnoh, namar kin ngat ha ki kyndon ain kaba 11,13 bad 17 jong ka Unlawful Activities (Prevention) Act, 1967, kumjuh hapoh ka kyndon ba 4 jong ka ain Unlawful Activities (Prevention) Act, 1967 bad ka kyndon  109 jong ka IPC.

Kumta la kyntu ia ki paidbah lada ki ioh jingthoh dawa pisa dei ban pyntip mardor sha ki pulit ban leh ia kaba donkam bad ki pulit kin ym iathuh ia ka kyrteng kiba shah dawa pisa, la ong DGP.