Pyntreikam ka MeECL da ka 11 KV ha jaka ka 33 KV ha Ri Bhoi Sepngi

Ka Confederation of Ri Bhoi People (CoRP) sengkmie ka dawa ia ka MeECL ban pyntreikam noh ia ka Sub Station ba 33 KV ha shnong Umsong, Ri Bhoi District, khnang ba ki paidbah ka thain Ri Bhoi sepngi kin ioh bording ilektrik thikna kumba long kiwei ki jaka. Ha ka jingjurip ka seng ka la lap ba katei ka sub station ba 33 KV la shna naduh u snem 2004 na bynta ai bording ha ka thain Ri Bhoi sepngi, hynrei haduh mynta ka dang treikam kum ka sub station ba 11 KV, kumta ki paidbah ka thain kim ju ioh thikna ka bording ilektrik bad bun ki shnong ki shong dum, kumba long mynta ka jingduh light ka long khah khah ha ka thain bad kane ka lah ban dei na ka jingtlot ka bording ilektrik namar la pyntreikam da ka 11 KV ha jaka jong ka 33 KV.

Ha kajuh ka por ka seng, ka pynpaw ka jinglyngngoh ba ki bor MeECL ki la iathuh ha ki snem ba la dep ba katei ka lain ka la poi haduh Lailad, hynrei haduh mynta kam pat pynpoi ha shnong Umsong. Kumta ka kyntu jur ia ka MeECL ban pyndep kloi ia ka lain bording ba 33 KV, khnang ba ki paidbah ka thain kin ioh tikna ia ka bording ilektrik. Halor kane ka seng kan sa bud dien balei ka MeECL ka shim por da ki snem ban pyndep ia ka lain jong ka 33 KV na Nongpoh sha Umsong, kane ka pynpaw ba ka MeECL ka jingkhein sting ia ki paidbah ka thain Ri Bhoi sepngi. Namar wat ka ophis jong u SDO kaba la mang ban buh ha Patharkhmah haduh mynta kam pat pyntreikam.

Ha ka jingleit jurip ki nongtrei ka MeECL ba dei peit ia katei ka sub station, ki la iathuh ba la pyntreikam shipor da ka lain ba 33 KV, hynrei hadien katto katne bnai kam shym la treikam shuh na ka jingthud ki sainar namar ia ka lain la pyniaid na khlaw bad la palat 6 snem ka treikam tang da ka 11 KV bad kane ka buh jingeh ban pynbiang bording ia ki paidbah ka thain. Na liang ka seng ka kyntu ia ka MeECL ban pyndep kloi noh ia ka lain 33 KV na bynta ka jingbit jingbiang ki paidbah ka thain Ri Bhoi sepngi, la pynkut ka kyrwoh ba la phah da u Bah Gershome Hat Vice President ka CoRP.