Ka FKJGP East Jaintia Hills District Unit hynne ka sngi ka la iakynduh ia u Member Secretary ka Meghalaya State Pollution Board ban pynpaw ia ka jingpyrshah jur halor ka jingthmu ka Kompeni Megha Top Cement Ltd ban pynlong ia ka Public Hearing ha ka 18 tarik ha Wahiajer,Narpuh East Jaintia Hills. Ka seng ka la pynpaw ia ka jingsngewkhia namar ka jingwan byllai ki karkhana Dewbilat ha East Jaintia Hills kaba lah ban buh jingma ia ka shnong ka thaw bad ka mariang. Haba kren sha ki lad pathai khubor u bah Deihok Sumer u President ka FKJGP EJHD, ula ong ba ka sorkar na ka por sha ka por ka ju pynshlur ia ki kharkhana dewbilat bad kane ka jingpynshlur ka lah ban don kaei kaei sha lyndet. “ Ngi la thoh sha u Member Secretary ban pyndam ia kane ka Public Hearing khnang ban nym jot ka thain,” ong u bah Deihok.
U bah Deihok ula ong ba haduh mynta ki don haduh 8 tylli ki karkhana sha kane ka thain, hynrei mynta lada ailad sa ia Megha Top kan buh jingma ia ka thain bad ka jylla baroh kawei namar kan sa ktah ia ka mariang, namar tang kiba la don lypa, la iohi lypa ki jingjot.“ Ka seng ka pynpaw ia ka jingpyrshah namar kan buh ka jingktah ia ka mei mariang namar tang kine kiba la don lypa ruh,ngi la iohi ia ki jingjot. Ngi khmih lynti ba ki paidbah kiba sngewkhia kin mih shakhmat ban pyrshah,”ula ong.
La khmih lynti ba ki paidbah bad ki nongialam shnong kin mih shakhamt ban pyrshah ia kane ka Hearing kaban long ha katei ka sngi. Ula ong ba ki thain kiban shah ktah na ka jingdon ka kharkhana Dewbilat kin dei ki thain Wahiajer, Thangskai bad ki bynta ka Narpuh baroh kawei. Ka seng ka la ong ba bun ki kompeni ki shu pynbiej ia ki paidbah da kaba kam ba kin ai kam ai jam bad ki shu wan ban pynbiej ia ki paidbah da kaba kam ruh ba kin wanrah ia ka roi ia ka par ha ka thain baroh kawei.
