Ka Jaintia Students’ Union (JSU) hynne ka sngi, ka la pyrshah jur ia ka jingthmu ka sorkar jylla ban phah pyniasoh ne Affiliate ia baroh ki College ha ka jylla Meghalaya bad ka Captain Williamson Sangma State University, Tura.
“Ka JSU kam kyrshan ia katei ka jingtyrwa bad kala dawa ba ka sorkar jylla kadei ban iasyllok bad baroh ki bor pyniaid college hashwa ban shim ia kano kano ka rai ha kaba ia dei bad ka ka kam pyniasoh ne Affiliation. Ka sorkar jylla kam dei ban pynbor ia katei ka Affiliation ia ki College,” ong u General Secretary ka JSU u Samla TR Suchen ha ka kyrwoh khubor.
Ka JSU kala pynpaw ba kam pyrshah ia ka State University, hynrei ka don pat ia ka jingartatien ia ka State University ka dang ka shu mih bad ki lah ban mih bun ki jingeh bad katei ka jingthmu ka lah ruh ban pynmih ia ka kynrum kynram ia ki college kiba don ha rilum Khasi bad Jaintia, kaba kynthup ia ki 55 tylli na ki 74 tylli ki college ha ka jylla.
Ka JSU ka kyntu jur ia ka sorkar jylla ba kadei ban kiar ban pyntreikam ia katei ka affiliation bad ka JSU ka ai jingmut ba dei ban lum ia ka jingialang bad ki bor pyniaid bad ki seng jong ki samla pule ban iatai sani bha halor katei ka mat bad ka JSU kala kyntu ruh ia ka sorkar jylla ban iakren bad ka NTA bad ka UGC ha kaba iadei bad ka jingpynlong ia ka CUET khnang ba kan lait na ki kynrum kynram hadien habud.
“Ngi banjur ia ka jingdonkam ban buh bun tylli ki examination center ban pynsuk ia ki samla pule bad ban pynbha ia ka Internet ha ki jaka ba pynlong ia ka eksam ban pynthikna ba ka jingpyndonkam ia ka Biometric kan long kaba iaid beit iaid ryntih. Ngi kyntu ia ka sorkar jylla ba kan kyrpad ia ka NTA ban pynduna ia ka bai eksam CUET namar kumba long mynta ka long kaba rem na ka bynta kito ki samla pule kiba wan na ki longiing baduk ha ka jylla” la pynkut u nongialam ka JSU.
