Ka myntri sorkar ka jylla ka Kong Ampareen Lyngdoh hynne ka sngi ka pyrshah jur ia kito kiba kynthoh ban thung ia ka MP barim ka jylla ka Agatha Sangma kum ka Chairperson ka Meghalaya State Commission for Protection of Child Rights (MSCPCR). Ka Kong Ampareen kala ong ba ym.dei ban shu kynthoh pyrshah bad kam long kaba iahap namar baroh kila trei shitom bha ban don ha ki kyrdan kiba ki don mynta. Halor kan jingshah kynthoh bad jingkynnoh ba ka jingthung ia ka Agatha kadei ka jingshah liang ne ba don ia ka jingiadei kaba iajan, ka Kong Ampareen kaba dei ruh ka Nongaiktien ka sorkar jylla kala ong, “Phi mut kumno da ka jingshah liang ne ba don jingiadei? Hato ka jingtbit ha ka jingtreikam kam long kaba donkam? Hato ka jingshemphang kam don jingmut? Kaei de kaba phi kwah? Ka (Agatha) ka long ka briew kaba biang tam na ka bynta ka kam, lada phi kylli ia nga hi shimet”. Ka la ong ba kam kren na ka bynta jongngo jongno ruh hynrei ka kren kum ka nongialam sain pyrthei.
“Lada ki don ki nongialam sain̈ pyrthei kumba don ka jingshemphang bad ih bha ha ka kam, kiba kloi ban bteng ban shakri ia u paidbah, haei kan don ka jingma. Hato kan don jingktah, ba kadei ka para jongno ne ka khun jongno?.Nga tharai ka jylla Meghalaya ka long kaba pyrshah ia ki longiing, kiba don ha ka kam sain pyrthei. Balei phim shaniah ia ngi ruh ba ngi don ia ka jingtbit? Lashai kawei pat ka khun jong u nongialam sain pyrthei ne kawei pat ka para kynthei ka ioh, phin kynthoh tyngeh ia ka ba kadei ba la leh shiliang khmat. Haduh katno phin rah ia kane ka jingkynthoh jong ka jingthungkam da kaba kynnoh ba kadei kaba leh shilliang khmat? Kine kidei ki briew kiba la tbit. Kaei kaba phi kwah ba ngin leh bad haba ngi wanrah ia ki briew ki bym pat tbit, phin ong pat ba kim dei kiba tbit”, la ong ka Nongialam ka NPP.
Ka Kong Ampareen kala banjur ruh ia ka jingdonkam jong ki paidbah ba kidei ban peit ia ki politishian katkum ka jinglah bad jingtbit ka jong ki bad ia ka nongrim.kaba ki ieng. “Nga kyrpad ia ki paidbah ka Meghalaya ba phim dei ban long kiba khlem akor kumne. Hooid, ngi dei kiba mih na ki longiing sain pyrthei.Hato phin pynrem noh ia ngi man la ka por? Hato phi klet ia ka jingnoh synniang jong uta u politshian ia ka jylla bad hato baroh ngi long kiba bieij bad ki bym don kyrdan ha ka jingtbit? Balei ngim long kiba biang? Sngewbha u don u pud halor kane ka jingiatai, ka jingleh shiliang khmat. Lada ki briew ha ka constituency ki jied ia u briew namar ba udei u khun ne ka lok ne ne u kurim jongu nongialam sain pyrthei, balei hato kadei ka jingeh? Balei phim ailad ia ka kynhun ha ka kam sainpyrthei ruh ba kin don iala ka jingim? Ngi ruh ngi dei ki briew, phi tip. Ngi don ruh ka thong bad ka jingangnud ban shakri ia ka jylla bad ki paidbah jong ka ri. Balei ba ki briew ki long pyrshah ia ngi? Kane ka dei ban kut noh,” kala ong.
Ka Kong Ampareen kala “Wat nym pynkylla ia ka jingkren ka jong nga. Lada ka briew ka jia ryngkhat ba ka long MP lai sien bad ka long kaba bit ban shimti ia ka kam Chairperson jong ka State Commission for Protection of Child Rights, hato phin kyntait noh ia katei ka briew tang namar ba kadei ka para jongno re jongno?.Phin klet noh ia ka jinglong MP lai samoi, kaba kala ai ia ka jylla, Phi ong aiu. Wat pynkylla ia kaei kaba nga la kren. Nga la kren shai kdar bha, watla ngi wan na ka iing kaba mih ki nongmihkhmat ha ka kam sain pyrthei hynrei ngi dei ruh ki briew”.
