Ka Meghalaya Rural Tourism Forum (MRTF) hynne ka sngi ka la pynpaw ka jingpyrshah jur ia ka jingdawa ka All Meghalaya Khasi Tourist Taxi Association (AMKTTA) ban khang ia ki kali bar Jylla ban kit ia ki nongwan shangkai pyrthei sha ki jaka jngohkai hapoh ka Jylla. Ia kane la pyntip da u President ka Meghalaya Rural Tourism Forum (MRTF) u Bah Alan West Kharkongor hadien ka jingiakynduh ia u Myntri ka tnat Tourism u Bah Paul Lyngdoh. Haba kren sha ki lad pathai khubor u Bah Alan West ula iathuh ha ka 30 Nailur, ka MRTF ka la lum jingialang ha ka jingdonlang ki Rangbah Shnong bad ki Sorkar shnong napoh ka thain Ri-bhoi district, Khasi bad Jaintia Hills. U la iathuh ha ka jingialang la iathir sani halor ka jingdawa ka All Meghalaya Khasi Tourist Taxi Association (AMKTTA) na ka Sorkar Jylla ban khang ia ki kali bar Jylla ban kit ia ki nongwan shang pyrthei sha ki jaka jngoh kai hapoh Meghalaya.
“Ha ka jingialang, ngi la shim ka rai ban pyrshah ia ka jingdawa ka AMKTTA namar kane ka long beain bad pyrshah ia ka Riti Synshar ka Ri India ban khang ia uno uno. u nong India ban wan ne rung sha kano kano ka Jylla ka Ri” la ong u Bah Alan West. U la bynrap ha ka jingialang ka la don ka jingiakren sani halor ka jingdawa ban pyntreikam da ka Sikkim Model hapoh Meghalaya halor ka jingpyrkhing ia ka jingwan ki kali kit nongjngoh kai pyrthei hapoh Jylla. U la iathuh ka Forum ha ka jingiakynduh ia u Myntri ka tnat Tourism u Bah Paul Lyngdoh, ka la dawa ban kynthup lang ia ki nongpyniaid kam jngohkai pyrthei ha ka Committee ba la thaw ka Sorkar Jylla ban khmih ia ki jingdawa jong ka AMKTTA.
“Ngi la kyntu ia u Myntri ka tnat Tourism ban khot noh ka jingialang jong ka Committee ban iakren halor ki jingeh ba kynduh ki Draibar kali Tourist bad ngi la ai jingmut ia u Myntri ba ka Committee ka dei ban pyndep ia ka kamram hapoh hynriew bnai bad na ka liang u Myntri ka tnat Tourism ula pynthikna ba shen ka Committee kan lum jingialang” u la ong.
