Ki Rangbah Shnong jong ki shnong bapher bapher ka them Ri Bhoi District ha ka shatri jong ka Synjuk ki Rangbah Shnong mynta ka sngi ki la leit kynduh ia u Deputy Commissioner ka district ban pynpaw ia ka jingpyrshah kaba jur halor ka jingthmu jong ka tnat sam bording ban pyntreikam noh da ki Smart Meter ha kylleng ki shnong nongkyndong ha kane ka district. Ia kane jingleit ia kynduh ia u Abhilash Baranwal, DC ka Ri Bhoi District na ka liang ka Synjuk ki Rangbah Shnong Ri Bhoi District la lamkhmat da u Bah BB Makdoh, Chairman lem bad ki Rangbah Shnong na ki Shnong bapher bapher. U Bah Makdoh haba kren bad ki Nongthoh Khubor, u la pynpaw ba ka Synjuk hi kam kyrshan ia ka jingthmu ban pdiang pyntreikam noh da u ta u smart meter na bynta ban siew ia ka bai pyndonkam bording ilektrik halor ka nongrim ba kam shem la don kano kano ka jingpynshai paidbah shwa ban shim ia kane ka sienjam khamtam ban pyntip pynshai ruh wat ia ki nongialam shnong ha kane ka district.
U la iathuh ruh, ba ka Synjuk kam don jingtip halor ka iohnong ne duhnong haba pyndonkam ia kine ki meter thymmai hynrei kaba lyngngoh ka long ba kita ki Komiti kiba shimti ban leit pyndait ia kine ki meter ki la shu rung sha ki thliew iing khlem ka jingpyntip ne mynjur da ki nongshong shnong kaba eh ka long ba don ki longiing ki bym da nang da stad ki la shu pdiang ia kine ki meter bad haba dei ka por siew Bai bording ka jinglut ka kiew arshah laishan bad kane ka la buh jingeh shikatdei ia kiba bun ki longiing. “Balei ka tnad sam bording ha kane ka jylla ki la shu ia bunkam ban leit kylliang ia ki meter pyndonkam bording hynrei ban phaikhmat ia ki jingdonkam ia ki post ilektrik ba thymmai kiba bun ki la phut bad shroin kam don eiei kiba kum kata hynrei ki la shu buh ia ki paidbah ha ki jingma kiba khraw”, ong u Bah Makdoh.
Kumta na ka liang ka Synjuk ki Rangbah Shnong hi ki la khot la wer ia kiwei kiwei ki Rangbah Shnong ruh ban kyrshan halor kane ka phang ban lait na ki jingeh hadien habud ha kaba la kyrpad ruh ia u DC ban pynsangeh shwa ia kane ka jingthmu kylliang ia ki meter bording tad ynda ka tnad sam bording kan da leit pynshai paidbah shwa halor kane ka mat. Na ka liang u DC hadien ba u la sngap ia ka jingdawa jong ka Synjuk ki Rangbah Shnong, u la kular ban shimkhia halor kane ka mat da kaba ong ruh ban un sa ia kren bad ki bor ba halor jong ka tnad sam bording.
