Ki sengbhalang kynthup ka Federation of Khasi Jaintia and Garo People’s (FKJGP) bad ka Khasi Students Union (KSU) Upper Shillong Circle ryngkat ki nongialam shnong hapoh ka Synjuk ki Nongsynshar Shnong Upper Shillong hynne ka sngi ki la rai ban pyrshah ia ka jingai jaka ka sorkar ia u bar jylla ban shna Petrol Pump ha Upper Shillong ha ka jaka jong ka tnad Veterinary & Animal Husbandary. Haba iakren bad ki nongthoh khubor, u President ka FKJGP Upper Shillong, u Bah Kitboklang Nongphlang ula ong ba kane ka kynhun kam pyrshah ban tei ia ka Flyover ne ban pynthud ia ka jingshna ia ka surok Four Lane hynrei ka jingpyrshah jong ki ka long ia ka sorkar jylla ban ai jaka ia u Bar Jylla haduh 13500 Sq ft ban tei ia ka Petrol Pump ha Upper Shillong.
Ula ong, haba ka sorkar ka shim jaka na ki trai jylla ka shu siew tang ka bai jaka bad ki hap wad jaka hi shawei, hynrei kaba sngew thamula ka long ba ka sorkar hadien ba ka la shim jaka na u Bar Jylla kaba tang 2000-2500 sq ft ha Anjalee Petrol Pump hynrei ka la ai jaka haduh 13500 Sq ft ban tei ia ka petrol pump kaba thymmai bad une u bar jylla ula ioh jaka haduh 3 ne 4 shah na ka jaka kaba ula ai ia ka sorkar jylla. “Balei ka sorkar ka hap ban ai jaka ia une u bar jylla bad ka pynleh khun khatduh beit ia ki bar jylla katba ia ki trai jylla kam ju ai satia ia kum kine ki jait jingtyrwa kiba kyrpang” la ong u Bah Kitboklang Nongphlang.
Ula iathuh, wat la ki sengbhalang bad ki nongialam shnong ki la pyrshah naduh ka 3 tarik u Nailar 2023 hynrei ka sorkar kam shym la khot iakren ia ka seng ne ia ki nongialam shnong hynrei ki la iaid shakhmat ban ai jaka bad ka Dorbar Shnong Sanmer ka la ai NoC ban kynriah ia katei ka Petrol Pump jong ka M/S Ashok Auto Service. Ula iathuh ka Synjuk ki Nongsynshar Shnong ha u snem ba la dep ka la ai dorkhas ha u Myntri Rangbah ka jylla u Conrad K Sangma ban ym ai jaka ia u bar jylla ha ka jaka sorkar ha Upper Shillong. “Ngi maham jur ia ka sorkar ba lada ka ai jaka ia ki bar jylla ha ki jaka sorkar, kan plie lad ia kiwei pat ki bar jylla ba kin ioh ia ki jaka sorkar nangne shakhmat lada ym don ki ban pyrshah” la ong u Nongialam ka FKJGP bad ula bynrap ka kynhun kan iai bteng ban bud dien halor kane ka mat.
