Ki nongialam ka party Voice of the People Party (VPP) ba la lamkhmat da u President rangbah u Bah Ardent Basawiamoit ki la leit ban jurip syndet ia ka Conservation Training Institute (CTI) ha Ampher, Byrnihat ban pynpaw ruh ia ka jingpyrshah kaba jur halor ka jingthmu pynkylla noh sha ka Industrial Areas kaba dei ruh ka jingthmu kaba sopsop jong ka sorkar jylla Meghalaya. Ki nongialam ka VPP kiba la leit jurip ia katei ka jaka jong ka CTI kaba la thmu pynkynriah noh sha Mawkhanu, East Khasi Hills District, la donlang ruh nalor u Bah Ardent, u Bah Brightstar Marbaniang, MLA ka Mawrynkneng,u Bah Heavingstone Kharpran nalor kiwei kiwei.
Haba kren bad ki Nongthoh Khubor, u Bah Ardent Basawiamoit u la iathuh ba ka seng VPP da leilei kan nym kyrshan ia ka jingthmu ka sorkar ban pynkylla jaka ne karkhana kum kita ki Industrial Areas ha kane ka jaka ba ieng ka CTI jong ka Soil and Water Conservation mynta da ki phew snem namar kane ka dei kam kaba sopsop jong ki bor ka sorkar jylla. U la iathuh ruh, ba ka VPP kumjuh ma u kum u MLA ki la dep ban kren ia kane ka mat ha Iingdorbar thaw ain bad ruh ban thoh sha ka sorkar jylla ban pan jingshai halor ka jingthmu pynkynriah ia ka CTI sha Mawkhanu bad balei ba thmu pynkylla Industrial area ha katei ka jaka ba ieng ka CTI hynrei haduh kine ki khyllipmat kam shem la don kano kano ka jubab na ka liang ka sorkar ne ki bor ba dei khmieh.
“Ngin nym ailad da leilei ruh ban pynurlong ia kane ka jingthmu jong ka sorkar jylla kaba lah ban don eiei sha lyndet, bad lada ka sorkar jylla ka iaid lait ne pynibor ka VPP lem bad u paidbah ruh ki kloi ban pynibor ban pyrshah ia kane ka jingthmu pynkylla ia ka CTI sha ka Industrial Areas “, byrthen u Bah Ardent Basawiamoit.
