Ka Meghalaya & Greater Shillong Progressive Hawkers and Street Vendors Association (MGSPHSVA) kaba dei ka seng jong ki nongdie madan ka la pynpaw ba ka pyrshah jur ia ka jingthmu ka sorkar jylla ban pynkynriah noh ia ki nongdie madan sha kawei pat ka jaka.
U General Secretary ka MGSPHSVA u Bah Shane Thabah ula ong ba kim pdiang ia ka jingthmu ka sorkar ban pynkynriah noh ia ki nongdie madan sha kawei pat ka jaka bad ban pynkynriah ia ki nongdie madan ka dei ka kam kaba lah ban leh tang da ka Town Vending Committee (TVC) bad ka jingkren u Myntri Jngohkai u Bah Paul Lyngdoh ban pynkynriah noh ia ki nongdie madan na Khyndailad ka dei ka bym lah pdiang satia.
Ula ong ba ka jingkren u Bah Paul ka dei ka bym lah ban pdiang satia ba pynkynriah ia kiba shong die madan ha Khyndailad namar ba kane ka iew ka dei ka “Natural Market” bad ka “Heritage Market” kaba la don da ki phew phew snem kumta ym lah ban weng ia ki bad kin ym pdiang ban pynkynriah noh ia ki.
Ka President ka MGSPHSVA ka Kong Biolin Pyrtuh kala ong, ba ka TVC ka la shong jingialang hynrei ym shym la iakren eiei ban pynkynriah noh ia ki nongdie madan sha kawei pat ka jaka, kumta katba ka TVC kam pat tip eiei ia kane ka phang kin ym pdiang hi ruh ia ka jingkren jong u Bah Paul.
“Lada u Bah Paul u dang iai bteng ban kren ia kajuh shi kajuh ban pynkynriah ia ki nongdie madan, nga dawa ba u dei ban hiar shuki noh kum u Myntri namar ym tip ia ki Rule bad ia ki Ain shaphang ki nongdie madan” ong ka President ka MGSPHSVA
Ki nongialam ka MGSPHSVA kila iathuh ruh ba ha ka jingialang jong ka TVC, ha baroh kawei ka sor Shillong ka sorkar ka pdiang ban ai lisen ia ki 1400 ngut ki nongdie madan tangba kam pat ong eiei hangno yn pynshong die jingdie ia ki pat.
Ki la iathuh ba kila shong jingialang bad ka sorkar naduh u snem 2018 kam pat don shisien ruh ka jingiapynbeit ban pynkynriah noh sha kawei pat ka jaka bad kila ong ba ka seng MGSPHSVA kan peit ba kiba dei hok kidei ban ioh beit iaka lisen katba ki bym dei hok pat kim dei ban ioh ia ka lisen ban shong die madan.
Ha kaba iadei vad ka jingud jingnam ki paidbah ia ka jingkhapngiah ka sor Shillong namar ba la bun palat ki nongshong die madan, ki nongialam ka MGSPHSVA kila kubur ia ka jingbun ki nongdie madan bad ka jingiaid ki kali kala buh ha ka jingeh iaka iaid ka ieng jong ki paidbah.
Ki la ong, ba kane ka jingeh kala mih namar ba ka sorkar jylla naduh ki snem kiba la leit kam shym la shimkhia ha ka por ba ki nongdie madan ki dang don tang khyndiat ngut eh bad ka dang suk bha ia ka sorkar.
