Pyrshah ki trai shnong bad ki nongialam skul ban ai jaka ia ki nongdie madan

Dang shen ka Myntri Sorkar ka la pynbna ban kynriah lut ia baroh ki nongdie madan na ki surok bah ka Laitumkhrah sha ka surok Veronica Lane. Haba ia dei bad kane ka rai, ki nongshong shnong bad ba khmih ia ki shlem ai jinghikai ba don hapoh ka thain Veronica Lane Laitumkhrah hynne ka sngi ki la mih ban pynpaw ka jingpyrshah ia ka jingthmu ban ai jaka ia ki nongshong die madan. Kum ban shu pynkynmaw, hapoh ka surok Veronica Lane, ki don ki shlem ai jinghikai ba kynthup ka Bethany Society, Mary Rice Center, Jyoti Shroat School, bad ka Hospital sumar khmat.Haba kren sha ki lad pathai khubor ka Kong Monalisa Wankhar ka la iathuh na ka liang ka Sorkar Jylla bad ka Dorbar Shnong ki khlem iamir jingmut hynrei ki la shim ia ka rai kyrkieh.

Ka Kong Monlisa ka la iathuh ba ia kane ka surok ka dei kaba la pyndonkam da ki khynnah skul kiba leit sha ki skul ba don ha sawdong ka thain Laitumkhrah. Ka la ong ba ka jaka iaid kjat (Footpath) hapoh ka Veronica Lane ka dei kaba la rit lypa bad la da shong ki nongdie madan kan nang pynkhapniah shuh shuh ia ka surok ka kan buh jingeh ia ka iaid ka ieng ki khynnah khamtam kiba wan pule bad kiba wan phah sumar khmat.

“Nalor ki shlem ai jinghikai ia kiba duna bor met, ia kane ka surok la pyndonkam bha da ki khynnah skul kiba leit skul ha kylleng sawdong ka Laitumkhrah bad ki briew kiba wan shah sumar” la ong ka Kong Monalisa.Ka Kong Monalisa ka la iathuh ba ka jingheh jong kane ka jaka ka long kumba 2-4 phut ka jinglait bad 800-900 ft ka jingjrong bad kane ka jaka ka long kaba ju shlei um ha ka por lyiur. Ka la ong ba kum ki nongshong shnong jong ka Veronica Lane, ki dawa na ka Myntri bad ka Dorbar Shnong Pyllun ban pynshai halor kane ka jingthmu ban ai jaka ia ki nongdie madan ha kane ka jaka.