pyrton ki pulit CAPF phah ka ECI na ka bynta ka ilekshon MP

Ka tnat Election Commission of India (ECI) kala phah haduh 40 pyrton ki Central Armed Police Force (CAPF) sha Meghalaya ban pynthikna ia ka jingpyniaid beit iaid ryntih ia ka ilekshon Lok Sabha ka ban long ha ka 19 tarik Iaiong. Ia kane la pyntip dak u Chief Electoral Officer (CEO) u Dr BDR Tiwari bad ula iathh ba haduh mynta la wanpoi 5 pyrton ki CAPF ha Meghalaya.

Haba kren sha ki lad pathai khubor u BDR Tiwari u la pyntip ruh ba ka tnat kala kala dep ban pynkhreh lut nadong hadong naka bynta ka ilekshon haka 19 tarik Iaiong khamtam ban pynthikna ba ka jinglong jingman kan long kaba suk ka shngain hapoh Meghalaya. “Ngi la ioh haduh 40 pyrton ki Central Armed Police Force (CAPF) bad haduh la wanpoi 5 pyrton ki CAPF ban pahara na ka bynta ka ilekshon MP 2024” la ong u BDR Tiwari.

U CEO ula pyntip ruh ba ia ki kam khappud, ka ophis kala dep ban iakren hashuwa jong ka ilekshon bad ka ECI ruh kala dep pynmih ia ki jingbthah kiba donkam bad ka ophis kala iakren bad ki Jylla kiba marjan. Haba kylli, U CEO u khlem ai pat ia ka jingdon ki Polling Station kiba don jingma bad kiba lah ban pynmih jingkulmar hynrei ula pynksan baka tnat ka la leh iaka ba donkam.

Nalor kane, ula pyntip ba kila don artylli ki jingujor bala ioh pdiang haba iadei bad ka jingpynkhein ia ki kyndon ka Model Code of Conduct (MCC). Haba kylli ia kiei ki jait jingujor, u CEO ula ong “Ia kine kiei kiei phi lah ban pan jingtip na ki Deputy Commissioner”. Ula ong ba ki artylli ki jingujor ki dei kiba la ioh pdiang lyngba ka C-vigil bad la dep ruh ban bishar ia ki.