kaba la wanrah lang ïa ki sap ba phriang tam na ki skulbah jong ka sor Shillong kaba kynthup haduh 33 tylli ki sor bad kaba la long ha palat 300 tylli ki skulbah, ha kaba la ai lad ïa ki khynnah ban pyni ïa ki sap jong ki ha ki bynta bapher bapher kum ka rwai, ka shad, ka stand-up comedy bad ka jingpyni ïa ka ktien. Ka Grand Finale jong ka College Ke Tashanbaaz kaba la pyniaid da ka Red FM ka la wai ha ka 14 tarik Nailur 2024 ha Seng Khasi College, ha kaba ka Ace Merakis, ka kynhun shad na Shillong Commerce College, ki la jop ïa ka kyrteng Tashanbaaz jong u snem 2024. Ha kane ka jingïapynisap kaba la ïaid lyngba 10 tylli ki skulbah ha Shillong, la jied ïa ar ngut ki nongjop na manla ka skul ban ïashim bynta ha kane ka jingïakob ba pawnam, ha kaba la ïoh pyni ïa ki sap ba pher bapher. Ka Ace Merakis ka la pynshong shit ïa ki nongbishar bad ki paidbah, ha kaba ki la ïoh rah ïa ka song pisa kaba T.11,000. U First Colour Lathong, uba dei u nongrwai na St. Anthony’s College, u la ïoh ïa ka Boom Boom Boomer Special Prize, kaba la pynkhlaiñ shuh shuh ïa kane ka sngi ba don jingmut.
Kane ka jingïalang ka la pawkhmat da ka jingïadon lang u nongrwai ba pawnam u Aiborlang Marbaniang, u nongshon-guitar bad uba dei u dkhot jong ki kynhun rwai ba paw ha Shillong kum ka Still Status, Awakening bad Fireflood, ryngkat bad ka Bahun Marwein, kaba dei ka nongthoh jingrwwai (songwriter) ba pawnam bad ka Lecturer jong ka economics, kiba la long kum ki nongbishar ha kane ka jingïalehkai. Ka jingtip bad ka jingai jingmut jong ki ka la nang pynheh bad pynbha shuh shuh ïa kane ka jingïakob. La plie ïa ka jingïalang da ka jingkren na u bah W.B. Rynjah, Principal jong ka Seng Khasi College. Ka Station Head jong ka Red FM, ka Jacqueline Thangkhiew, ka la ai ruh ka jingkren kaba khyndiat ban pynpaw ïa ka jingsarong halor ki sap kiba la pyni bad ïa ka jingjop jong kane ka jingïalang. Nalor ka jingpynbyrtha, ka jingïalang ka kynthup ruh ïa ka jingai jingtip lyngkot halor ka HIV/AIDS da ka Meghalaya AIDS Control Society (MACS) Shillong.
La pynwai ïa ka jingïalang da ka jingai khublei na u bah H. Rynjah, Assistant Professor jong ka History Department ha Seng Khasi College, ha kaba la pynpaw ïa ka jingburom kaba khraw ïa baroh ki nongshim bynta bad kiba la pynurlong ïa kane ka jingïalang. Da kane ka College Ke Tashanbaaz, ka Red FM ka la ai shuh shuh ïa ka lad kaba khraw ban pyni ïa ki sap jong ki samla Shillong, kaba pynneh ïa ka nam jong kane ka sor kum ka jaka ba khraw ha ka jingpynpaw sap bad jinglah jong ki samla.
