Haka jingiakop Miss Jaiñtia Queen First Audition ba pyniaid daka Khliehiongriang Social & Cultural Club, Jowai haka 12/10/24 ka Aishwariya Malang kala long ka nongjop ba hakhlieh tam da kaba ioh phong iaka pansngiat Miss Jaiñtia Queen napdeng ki 13 ngut kiba wan shim bynta. Ka Aishwariya Malang nalor ba ioh phong pansngiat Miss Jaiñtia. Queen, kala ioh rah ruh haduh lai tylli ki sub title ba kynthup kum ka Miss Popular, Miss Talented bad ka Miss Photogenic. Kaba iohrah iaka nam 1st runner up dei ka Dorachwa Daw kaba iohrah ruh iaka sub title Miss Personality, katba ka Ephida Ymbon ka 2nd runner up kala ioh rah ruh iaka nam Smiling Queen. Kiwei pat ba ioh sub title kum ka nam Miss Perfect 10 la ioh ka Isadella Bareh, Best in Ramp Walk la ioh ka Firstin Roy Kam, katba iaka nam Fashion Icon la ioh ka Rimika Dkhar.
Shwa ban sdang ia kane ka jingiakop la don ka jingialang plie ia kane ka rynsan iakop da u Paul Lyngdoh myntri ka tnat Arts & Culture, ka tnat Tourism bad kiwei ula wan sakhi kum u kongsan haka jingdonlang u Phasmon Dkhar MDC JHADC, u Nehemayah Tyngkan bad kiwei. U waheh shnong Khliehiongriang u K.Ladia haba kren lamkhmat u iathuh ba ka jingpynlong ia kane ka rynsan iakop dei ban pynmih fund naka bynta ban shna iaka Community Hall kaba dang bun ki jingdawa khnang ba ha kane ka hall ki khun ka shnong kin ioh ban ia kynduh lang bad pyndep bun ki kam naka bynta ka bha ka miat ki khun samla ka shnong bad ka imlang sahlang kumjuh.
Naka liang u Paul Lyngdoh haba iaroh ia kane ka sienjam bala shim ka Khliehiongriang, ula pashat ki kyntien ai mynsiem iaki samla ba shim bynta da kaba ong, ka jingbhabriew ka palat ban iaka sniehdoh, kaba mut haba shim bynta ha kum kane ka jingiakop dei ban kynmaw ba ka jingbhabriew kam mut tang kaba lah iohi shabar, hynrei ka jingmut ba shisha jongka jingbhabriew dei kaba napoh bad kaba neh rta katba dang im u briew ne ka briew, katba ka jingbhabriew ba shabar pat ka neh katkum ka rta. Shuh shuh u ong haba don iaka jingbhabriew ba wan napoh, ki paw bad iohi lyngba ki kam, ki rukom kren bad jinglong ba mlien. Ha kane ka sngi u Paul Lyngdoh ula ai jingiarap ruh kumba 3 lak tyngka shaka Khliehiongriang Social & Cultural Club, Jowai.
