Rah ka Dabisharbha bad u Banpyndaplang ïa ka nam Miss bad Mr Mawkynrew

Ka tamasa Escape To Nongjrong harud ka Wah Umngot ha Mawkynrew C&RD Block kaba la sdang ka la kut noh hapdeng ka jingitynnad bad shongkun bha ha ryngkat ki prokram bapher hapher da ki jingtem bad jingrwai na ki nongrwai ba pawnam ka Ri Lum Khasi Jaiñtia ba kynthup ia ka samla Bahun Marwein, Gracyl Ropmay, Banjop Nongbri, Wanjop Sohkhlet ryngkat ka kynhun Mar Local nalor kiwei ha ryngkat ka jingwan sakhi da ki phew hajar ngut ki paidbah ym tang na katei ka thaiñ hynrei na kylleng kylleng kynthup kiba wan jngohkai na kiwei ki jylla bad na shabar Ri India kumjuh. Ha shwa ki jingtem jingrwai kiba la pynshongshit ia ki paidbah, ha kane ka janmiet ka la don ruh ka jingïakob pyni dur bhabriew ryngkat ka riam ka beit ba la ia shim bynta da ki samla kynthei bad shynrang lem ki longkmie na ki shnong bapher bapher kiba hap ha ka Mawkynrew Constituency. Ïa ka nam lahduh na ka liang ki longkmie lane Mrs Mawkynrew 2024 la rah da ka Kong Kyntulang Rynjah na Synñiasya, ia ka kyrdan ba ar pat da ka Kong Shembhalin Mynsong bad ia ka kyrdan ba lai pat da ka Kong Ailibon Khriam kiba dei na Jongksha. Ia ka nam lahduh na ki samla shynrang lane Mr Mawkynrew 2024 pat la rah da u samla Banpyndaplang Ryndong na Thangsning, ia ka kyrdan ba ar da u samla Willborn Mynsong na Mawleiñ bad kaba lai pat la rah da u samla Kyrshanborlang Kharumnuid na Rapleng. Na ka liang ki samla kynthei pat lane Miss Mawkynrew 2024 ia ka nam lahduh la rah da ka samla Dabisharbha Mylliemngap bad ia ka kyrdan ba ar pat da ka samla Deibyntalang Mylliemngap kiba dei na Laitkyrhong katba ia ka kyrdan ba lai la rah da ka samla Jesica Nongpluh na Kharang. Ki khusnam pisa na ka bynta kine ki kyrdan jingiakob ki long 25000 tyngka ia kiba wan ba nyngkong, 15000 tyngka ia kiba wan ha ka kyrdan ba ar bad 10000 tyngka ia kiba wan ba lai. Ha shwa ki jingtem jingrwai ka la don ruh ka prokram jingshad da ki longkmie ka thaiñ Mawkynrew ba la lam khmat da ka Dr Amanda A Pakyntein kaba dei ruh ka kurim u Bah Banteidor Lyngdoh, MLA ka Mawkynrew. Ia kane ka tamasa la khot pynlong da ka Mawkynrew Tourism Sociable Society (MTSS ) ha ka jingialam u Bah Banteidor kum u President, u Bah Olet Kharsahnoh kum u Secretary nalor kiwei pat ha ryngkat ka jingïatreilang ka Meghalaya Tourism bad bor pynïaid shnong ka Nongjrong ha ka jingïalam u Bah Pynshai Synjri uba dei u Sordar kum shi bynta ban kyntiew ia ka kam jngohkai pyrthei ha ki thain ka Mawkynrew Constituency.

Kum ban shu kdew ba ka shnong Nongjrong ka dei ka shnong kaba paw bha ha ka jingkhring ia ki nongshangkai pyrthei na ka jingitynnad ki kjat sngi ha ka por mih sngi mynstep halor u lyoh ha ki them ka Wah Umngot kaba ker pyllun ia katei ka shnong. Kane ka shnong ka don ha ka ia ka mariang kaba ithiang, ki jait jingrep kum u sohñiamtra, ki jingtem bad ki jingrwai tynrai bad ha ryngkat ka riti dustur bad ka rukom im. Nalor kiwei pat ki mar rep, ki sohñiamtra ha kane ka shnong ki dei kiba lah ban ih bad dang lah ban ioh haduh ki taïew ba khatduh jong u bnai Lber bad taïew sdang jong u bnai Iaiong man la u snem. Ha kine ki ar sngi jong kane ka tamasa, ki nongshong shnong kumjuh ki na ki Self Help Group bapher bapher ka thaiñ kumjuh kiba na bar ka Constituency ki l wanrah ka ki mar jingdie jong ki kynthup u sohñiamtra, ki jingbam tynrai, ki mar rep, ki um soh, ka wine bad kiwei pat ban ia die ia thied ha kane ka tamasa nalor ki jingbam khutia mutia. Ka Society ha kine ki ar sngi nalor ki rynsan iakob pyni dur bhabriew bad ki jingtem jingrwai ka la pynkhreh ruh ia ki jaka sah miet ne camping, ka jingiaking lieng kynda ne kayaking, ka jingpynher parachute ne paragliding, ki jinghiar tyllai na shiliang sha shiliang ka Wah Umngot nalor kiwei pat ki prokram. Ha ka sngi sdang jong kane tamasa ha ka por janmiet ki la don ruh ki jingrwai jingtem na ka kynhun Snow White bad kiwei ki kynhun tem bad kynhun rwai na ka thaiñ.

U Bah Banteidor haba kren ha ka jingïalang plie ia kane ka tamasa kum u Kongsan ha ka 16 tarik u Rymphang, 2024 u la ong ba ka jingthmu kane ka tamasa ka long ba ki nongshong shnong kin shim ia ki lynti ban kyntiew ia ka ioh ka kot na ka kam jngohkai pyrthei bad ia ka Society ruh la seng ha kane ka nongrim. “Naduh u 2018 ngi la pyrshang ha ryngkat i Bah LT Tariang, BDO ka Mawkynrew ha katei ka por ban kyntiew ia ka kam jngohkai ha kane ka shnong bad suki suki mynta na ka jingsdang kaba rit ka la nang pynïoh lad ia ki nongshong shnong ban ioh kamai da kaba ba buh bad don mynta haduh 7 tylli ki iing basa na ka bynta ki nongwan jngohkai”, la ong u Bah Banteidor. Da kaba pynpaw ba ka Mawkynrew ka don bun tylli ki jaka jngohkai ba itynnad nalor ka Laitlum, Syntung, ka Kshaid Pdem ha Khlieh- A- Sem, kaba ki briew ki la hiar na ka por sha ka por ban leit jngohkai, u MLA u la ong ba ka bor ka jingïatreilang kan lam sha ka jingjop ha kino kino ki kam kiba ia thmu bad kane ka sien ba mynta ka dei kaba nyngkong ïa ka thaiñ.