Ki nongialam ka Eastern Ri Bhoi Tourism and Environment Development (ERTED) ha ka jingiatreilang bad ka Tyrso Valley Wildlife Protection Society (TVWPS) ki la lah ban pynkut noh ia ka tamasa Amur Falcon Festival 2024 da kaba iphuh iphieng ryngkat ka jingiakop Miss bad Mr Amur Falcon 2024. Ia kane ka tamasa ban lehkmen ia ka jingwan iuhkjat jong ki sim Kbeit shisien shisnem ban iuhkjat ha ka shnong Tyrso, Umru bad kiwei kiwei ban pynbna ia ka khubor ban iada ia kine ki jait sim bad ruh ban kyntiew ia ka kam jngohkai pyrthei, la sdang ia kane ka tamasa naduh ka 7 tarik Naiwieng haduh ka 9 Naiwieng 2024. La pynshong kun ia kane ka tamasa ba lai sngi, da ka jingwan ia shim bynta ki nongrwai na kylleng ki jaka ka jylla la pynshongshit ruh pat da ka jingiakob iaid thei bad rang bhabriew ba la shim bynta da ki thei bad ki rang ka thaiñ Eastern Ri Bhoi, ha kaba ka samla Deiphibanri Mynsong bad u Samla Pynthymmai Sylliang ki la ioh ban rah ïa ka nam Miss bad Mr Amur Falcon 2024.
Haba kren ha kane ka sngi, u General Secretary ka TVWPS u Bah Alos Nongpoh, u la iathuh ba ia kane ka tamasa mynta u snem la pynlong kyrpang da ka jingiatreilang bad ka ERTED da ka jingangnud ban nang kyntiew ia kane ka tamasa ban pynpaw pyrthei ïa ki jait sim kbeit ba la tip kum ki Amur Falcon kiba ju wan man u snem ha ki bnai Risaw ha ka thaiñ Tyrso bad Umru ha Ri-Bhoi District ban pynphriang ruh ia ka khubor ban iada ia kine ki jait sim na ka jingpyniap pathar.
U la iathuh ruh, ba ka thong kaba hakhmat eh ka long ruh ban iada ia kine ki sim kiba wan da ki lak tylli ban wan her sha kine ki shnong ka la nang khring ia ki paidbah ban wan jngoh ia kine ki sim sha kine ki thaiñ kaba long ruh ka lad ban kyntiew ia ka kam jngohkai pyrthei da kaba angnud ruh ba ka sorkar jylla lyngba ka tnad Tourism kan phaikhmat ban kyntiew shuh shuh ia kane ka tamasa.
