Ka nongialehkai pyniksah na ka jylla ka Whitney Queen Lyngdoh Mawphlang ka la rah ia ka nam lahduh ha ka kyrdan (women) ‘Sports Model’ bad ba-ar ha ka kyrdan (women) Bikini ha ka jingiakop Mr bad Ms India ba 11th National Bodybuilding and Fitness Championship 2023 ba la long ha ka 15-17 tarik Nohprah ha Jaipur, Rajasthan.
La iathuh ka leit shim bynta ryngkat bad 7 ngut nongialehkai jong ka synjuk World Fitness Federation na jylla Meghalaya bad khur ia ka jingjop ha ka kyrdan women ‘Sports Model’ ban wanrah burom ia ka jaidbynriew bad ka jylla wat hapdeng bun ki jingeh, namar ki hab bei hi ia ki jinglut jingsep ban leit shim bynta sha katei ka rynsan ialehkai shabar jylla.
Haba kren bad u nongthoh khubor ka kong Whitney ka pynpaw ka jingsngewkmen ban ioh rah ia katei ka namlahduh ha ki jingiakop National Level hynrei kaba sngewsih ka long na ka liang ka sorkar jylla kam pat ithuh haduh mynta ban ai mynsiem bad pynshlur lem kum kiwei ki nongialehkai sports.
Ha kajuh ka por, ka ai khublei ia u Coach bah Donbor Rumnong uba iarap ban hikai pyntbit ha kine ki snem ba la dep haduh ba kan iohrah ia ka namladuh ha ka jingiakop ryngkat bad kiwei ki nongialehkai na kylleng ka ri India. Ka ai khublei ruh ia u bah Adelbert Nongrum MLA bad u bah Banteidor Lyngdoh MLA kiba la ai jingiarap bad kumjuh ia kiwei ki paralok kiba la noh synniang ban iarap ha kane ka jingleit iakhun sha ka National Bodybuilding and Fitness Championship 2023.
Ka kong Whitney ka la iathuh ka ju leit shim bynta ha ki jingiakop hapoh ka jylla bad ka la shim bynta ruh ha ka North East Bodybuilding ha u 2022 ha jylla Sikkim bad ka la rah ia ka jingjop, hynrei ka pynpaw ia ka jingsngewdiaw haduh mynta kam pat jingiarap eiei na ka sorkar jylla.
Ka la ong ka la sdang ia kane ka jingialehkai da 2 snem ha Genfit Gym Mawlai Nongkwar, Shillong bad da ka jingiarap u Coach bah D Rumnong ka la kiew stet ha ki jingialehkai bad rah ia ki jingjop ha ki jingiakhun bapher bapher.
+ There are no comments
Add yours