Rai ka kynhun Myntri ban pynjlan 6 bnai ia ka samoi treikam ka KHADC bad JHADC

Ka kynhun Myntri Sorkar ka la mynjur ia ka jingtyrwa ban pynjlan ia ka samoi treikam jong ka Khasi Hills Autonomous District Council (KHADC) bad Jaintia Hills Autonomous District Council (JHADC) sha hynriew bnai.Lah ban kdew ba ka samoi treikam jong ka KHADC bad JHADC kin kut noh ha ka 4 tarik Lber, 2024 bad hynne ka sngi ka Sorkar Jylla ka la rai ban pynjlan ia ka samoi treikam naduh ka 5 tarik Lber ka ban long hynriew bnai kynthih.

Haba pynbna ia kane u Symbud Myntri Rangbah ka Jylla u Bah Prestone Tynsong uba khmih ia ka tnat District Council Affairs (DCA) ula iathuh ba ka daw ba pynjlan ia ka ilekshon jied Nongmihkhmat lane MDC thymmai jong Ka KHADC bad JHADC ka dei namar ba kine ki Council ki la kyrpad ban nang pynjlan ia ka jingai por ia ki Delimitation Committee ban pyndep ia ki kamram.U Bah Prestone u la pyntip ba u Lat ka Jylla ha u snem 2023 ula ai bor ia ki District Council ban thung ia ka Delimitation Committee ki ban pynbeit ryntih ia ki MDC constituency jong baroh 2 tylli ki Council kat kum ka jingdon ki nongshong shnong bad kiwei kiwei.

“Dang shen ki ar tylli ki Council ki la phah ia ka jingtyrwa sha ka Sorkar Jylla ban pynjlan shuwa ia ka jingtreikam jong ki Delimitation Committee” la ong u Bah Prestone. U Bah Prestone ula iathuh ba kane ka rai ka mut ruh ba ia ka ilekshon MDC jong ka KHADC bad JHADC la pynjlan sa hynriew bnai bad shen ka Sorkar Jylla kan sa phah ia kane ka rai jong ka Sorkar sha u Lat ka jylla ba un ai jingmynjur.