Ka ophis jong ka District Medical and Health Officer “DM&HO” Ri Bhoi District mynta ka sngi ka la pynlong ïaka program ban rakhe kyrpang ïa kane ka sngi ka 24 tarik, ïaiong kum ka sngi jong ka jingpang wieh lane ka “National Deworming Day” Ïakaba la pynlong haka skul jong ka Jubilee Presbyterian Secondary School Mapdang, Saiden. Ha kane ka sngi la pynlong ruh ïa kane ka juh ka program ha man ki Anganwadi Center haki shnong bapher bapher bad la ïoh ruh ban sam ïaki dawai wieh sha baroh ki khynnah kiba 1 snem haduh 19 snem ka rta.
Lyngba kane ka program la don ka jingthmu jong ban pynduh jait ïaki jing don jong ki wieh ha ki snier kpoh jong ki khynnah rit khynnah skul kiba dang don ha ka rta kaba 1 snem haduh 19 snem bad lyngba ki skul bad ki Anganwadi Center in lah ruh ban ïada ïa ki khynnah naki jingktah kiba shyrkhei lada don ki wieh haki kpoh jong ki.
Haba kren ha katei ka sngi ka Kong G Warjri, District Health and Education Ophisar ka la ïathuh Lyngba kane ka program ki thmu ban au jingiada ïaki khynnah naka jing don jong ki wieh ha ki snier jong ki dakaba ai ïaki dawai wieh ar sien haka shi snem kata ha u bnai Ïaiong bad ha u bnai Risaw bad kine ki dawai kin ïarap ha ka ban ïada iaka jingdon jong ki wieh ha ki snier kpoh jong ki khynnah.
Shuh shuh ka la kyntu ruh ïa ki khynnah ba ki dei ban dih tikna ïa une u dawai ha ryngkat ka jinglehkhuid dakaba sait bha ïaki kti ha shwa ba kin bam bad yn da ki wan shabar khnang ba ki jaboh kin nym ioh ban rung sha kpoh haba phi bam jingbam da ki kti.
