Ka Synod College, Shillong ka la rakhe kynmaw burom ïa ka їa ka sngi kynmaw burom tympang ïa u Thomas Jones, shi bynta ban kynmaw bad pyrto їa u synñiang jong u sha ka jaitbynriew Khasi bad Jaintia da kaba pynlong їa ka jingkren-kynmaw kyrpang (memorial lecture) halor ki kam bakhraw jong u.
Kiba їadon ha kane ka jingrakhe ki long, u Rev. (Dr.) B. L. Nongbri (Principal John Robert Theological College), u Dr. R.M. Lyngdoh (Principal Synod College), u Dr. M. Rani (Vice Principal Synod College), u Dr. G. Lyngdoh (Coordinator IQAC), ki nonghikai, ki nongtrei ophis bad ki samla pule jong ka college.
Ha kane ka jingrakhe la plie ruh їa ka dur u Thomas Jones da u ‘riewshemphang, u Rev. (Dr) B.L. Nongbri ryngkat ka jingsynran lang u Principal, Vice-Principal, Coordinator IQAC bad Convener. I Miss N. Tariang I la pule їa ka jingthoh na ka kot ba la ai kyrteng Ann Jones kum shibynta ban pynkynmaw їa ka jingїaid lynti u Thomas Jones bad ka tnga jong u ban poi shari Khasi.
Ka jingrakhe ka long kaba shongkun bad myntoi shibun lyngba ka jingkren na u ‘riewshemphang, u Rev. (Dr) B.L. Nongbri halor ka phang “Revisiting the Legacy of Rev. Thomas Jones and its implications for the Khasi Jaintia Society: A Subaltern Perspective”.
Ha ka jingkren u Rev. (Dr) B. L. Nongbri u la pynsngew ba u Thomas Jones u wan na ka longїing riewpaidbah bad na ka imlang sahlang kaba shah ñiewbeiñ bad shah synshar donbor da ki British. Shuh shuh u ong ruh ba u Thomas Jones haba u poi sha ri Khasi u їohi ba ka jaitbynriew Khasi kam їapher na ka jaitbynriew jong u, ka jaitbynriew kaba shah synshar ha kiwei pat. Kane ka jingshah synshar ha ki British ka saiñdur їa u Thomas Jones ba un trei їa kiwei pat ki kam ban kyntiew їa ki Khasi nalor kaba pynphriang їa ka Goslpel, kum kaba pynїoh їa ki dak thoh, kaba hikai ban thang shun bad bun kiwei pat.
U Rev. Nongbri u їathuh ba ka la don ka jingpyrshang kaba jur na ka liang ki bor synshar ban pyndonkam їa ka ktien Bengali ha ki jaka pule ba dang lung ha kato ka por, namar ba ki British ki pyrkhat ba ka ktien Bengali ka dei ka ktien kaba la pyndonkam ha ki jaka treikam bad ha ki jaka khaїi pateng, hynrei u Thomas Jones u la їeng pyrshah їa kane ka jingthmu ba dei ban pynrung da ka ktien Khasi ba їakren ha Sohra ha ka jaka jong ka ktien Bengali.
U Thomas Jones u la pynpaw bun sien ban їeng pyrshah їa ka sorkar phareng ha kato ka por na ka bynta ban pynїoh їa ka hok ki Khasi ha ka imlang sahlang, kiba u Rev. Nongbri u buh ha kine ki kyntien “Thomas Jones as prophet of Social Justice”.
