Ki pulit ki la register mukotduma ban tohkit halor ka jingïap u Ishaque Ali Khan Panna u nongïalam ba pawkhmat na Bangladesh bad u dkhot jong ka Awami League hadien ba ki la lap ïa ka metiap jong u na bri kwai ha East Jaiñtia Hills khappud bad ka Bangaldesh U SP ka East Jaiñtia Hills u Giri Prasad M ula ïathuh ba ka jingtohkit ka dang ïaid shakhmat halor kane ka kam.“Ngi dang rah ruh ïa kane ka kam sha u Deputy Commissioner khnang ba ki ba haïing hasem kin ïoh ban ithuh ïa ka metiap kaba la buh ha Khliehriat Civil Hospital hadien ba la leh ïa ka Post-mortem”, ong u SP.Ïa kane ka metiap ba la pyut la lap ha ka janmiet 26 tarik mynta u bnai hapoh ka bri kwai ba don ha thain Dona Bhoi kaba jngai 1.5 km na u pud ka Bangladesh.
Na ka met ki pulit ki ioh kurup ka passport Bangladesh kaba don ia ka kyrteng jong u Ishaque Ali Khan Panna. U Panna u la long u general secretary jong ka Chhatra League, ka kynhun ki samla pule jong ka Awami League.Ki lad pathai khubor ki iathuh ha ka 25 tarik Nailar ba une u nongialam jong ki samla pule u la khlad noh ha Meghalaya hadien ba u la phet krad na Bangladesh. Bun ki nongïalam ka awami league ki phet krad hadien ba u nongïalam jong ki bad ka Myntri Rangbahduh barim ka Sheikh Hasina u la shah hiar shuki Myntri Rangbahduh.
Kham mynshwa uwei uba haiing jong u Panna ula ong, ba ula khlad noh na ka jingpang klongsnam katba uwei pat uba haïing ula ïoh ka long ba u la rung shapoh Meghalaya lyngba ka Tamabil ba don ha Sylhet kaba jan bad ka Dawki. Shwa ia kane, ki heh pulit baroh ar tylli ki West bad East Jaintia Hills lem bad ki shipai BSF ki la ong, ba kim don jingtip eiei halor kane ka kam.
