Ryngkat ki riam tynrai, pynphuh ka Raid Nonglyngdoh ïa ka Shad Sajer

Ka Raid Nonglyngdoh kaba kynthup ïaki 6 kur, kata ka Kur lyngdoh kum u Lyngdoh Raid, ka Kur Maring (Khon jing) kum u Syiem Sad, ka kur Lapang kum Kongsan Lapang, ka Kur Nongkyum Kum ki Doloi, ka Kur Makri kum ki Mazi bad ka kur Nongshli kum ki pator, mynta ka sngi ka la ioh ban pynlong biang ïaka Shad Sajer kaba shisien shi snem jong ka kaba la pynlong ha u Law kyntang jong ka Raid Nonglyngdoh kaba don marjan bad ka shnong Mawjong. Ha kane ka sngi nalor ki Longsan ki mansan jong ka raid la wan ban sakhi lang ruh da u ADC ka Ribhoi u Bah Raja Brahma uba la long kum u kongsan, haka jingia synran lang da u bah B.B Makdoh, Chairman ka Synjuk Ki Rangbah Shnong Ribhoi, u bah Sensi Lyngdoh, u Lyngdoh ka Raid Nonglyngdoh, U bah Rayonald Kharkamni, Samla Pyndaplang Wahlang, u bah Linus Lyngdoh, Lyngdoh ka Raid Nongpoh, lem bad kiwei kiwei ki riew rangbah.

Ban pynneh pynneh pynsah ïa kane ka Shad Sajer kaba dei ka Riti ka Dustur kaba la ju ialam da u men ba rim u men bajah, Ka Raid Nonglyngdoh ka dang bteng ïa kane ka dustur haduh kane ka sngi kaba mynta da kaba pynlong iaka Shad Sajer hakaba ha kane ka sngi ki khun ki hajar jong ka Raid ki ioh ban ïa shim bynta haka Shad ka rwai bad ka tem tynrai. Ki nongpyniaid ia kane ka lehniam, ki la pynpaw, ba ka Shad Sajer ka dei kawei naka lehniam leh rukom jong ka ri ka raid Nonglyngdoh kaba ju leh man lah u snem ha shwa ban sdang ka thung ka tep ban nguh ban dem na u blei ba un theh ki jingkyrkhu ïaki khun ki hajar jong ka raid.

Ha ki por hyndai ïa kane ka lehniam Shad Sajer la ju pynlong 3 sngi lynter bad ha kine ki 3 sngi kin ioh ban pyndep iaka lehniam leh rukom ban ai nguh ban ai dem ïa u Blei. Bad ha ka miet kaba nyngkong kaba khot ka Miet thih dur ki khun Samla ki ioh ban ïa luh samla bad ha kane ka miet Kim ju shah ïaki ba la heh la San ba kin leit tuklar bad ïa kino kino kiba ioh lok na katei ka miet lane haka Shad Sajer ki ju khieñ ba ki long kiba donbok. Haka sngi kaba lai ki ioh ban pynlong pat iaka Shad ka tem hakaba ki khun ki hajar ki mih ha ryngkat ka riam tynrai ban pyndep iaka lehniam leh rukom. Haba kren kum u Kongsan, u Bah Raja Brahma u la pynpaw ia ka jingkmen ban sakhi dalade ha ka sien kaba nyngkong eh ia kane ka lehniam Shad Sajer kaba long shisha kaba shongkun bha kaba ju pynlong shisien shisnem da ka Raid Nonglyngdoh, da kaba ai ruh ia ka jingiaroh halor ka jinglah jong ka Raid ban pynlong ia kane ka lehniam shibynta ban pynneh pynsah ia ka riti ka dustur bad ka lehniam leh rukom kiba la pynlong naduh u mynbarim.

U la pynpaw ruh, ba watla bun na ngi ngi la kylla kum ki Christian hynrei ha kawei ka liang ngim dei pat ban klet ia la ka tynrai bad ka riti dustur kaba la suit la shor mynta da ki phew snem da ki mynbarim bad ba ngin burom ia la ka jait ka khong kaba ngi wan mih pyrthei, u la ai nuksa ruh ba ka jylla Nagaland ka dei ka jylla kaba bat bha ia la riti ka dustur da kaba pynlong ia ka tamasa Hornbill Festival haba bun kiwei ki jylla kim ju klet ia la ka riti ka dustur.