Uwei na ki nongwad RTI ubah Disparsing Rani, ula kynnoh ba ka jingsah khongreng kiba bun ki surok ha kiba bun ki jaka ha ka jylla, ka dei namar ba ki kontraktor kiba ioh kam, ki dei kiba shu rynkoh klas khlem pat pass bad shemphang. U nongwad RTI u bah Disparsing Rani ula ong ba ka jinglap jong u lyngba ka RTI, ka surok na Mawphlang sha Weiloi, bad kumjuh ka surok na Umlyngka sha Mawklot, ki suki bad dang sah khongreng haduh mynta, namar ba ki kontraktor kim don ki mashin kiba biang watla ha ka jingthoh ki pynbiang thik thik.“ Nga lap ba bun ki kontraktor ha Meghalaya kim don ki tiar ki mashin ba biang ha shwa ban trei ka kam, bun ki kontraktor ha kane ka jylla kim pat don ka jingshemphang ban pyntrei ia ka kam,” ong u bah Disparsing.
U la ong ba ka surok na Umlyngka sha Mawklot kane ka surok kam shym la iaid la shi snem tam bad bun ki briew kila mynsaw ba shu siang maw khlem don rong eiei bad ki syrok hi shoin ban iaid na katei ka jaka. Katkum ka jingong u bah Disparsing, “Haduh mynta dei tang ki Dhar Kompeni kiba don ki mashin ba biang ban pyntrei ia ka kam, katba kiwei kim biang ki tiar na bynta ban trei ia ka kam. Kane la lah ban pynshisha na ka jingtrei ha Umlyngka sha Mawklot.”
U bah Disparsing u la ong ba ka jingshna pynheh ia ka Mawphlang sha Weiloi kam dei ban duna ia ka 3 metre shiteng, nalor ka jingshna ia ki nala, ka jingrben ban siang rong bad kiwei kiba dei ban leh katkum ka jingthew thik pa thik, hynrei kaba lyngngoh ka long ba ka surok na Mawphlang sha Tyrsad ka la jot noh hadien ba la shna katto katne bnai. “Kane ka long kum ka ‘Yellow Card’ bad ka jingmaham sha ki kontraktor ba haba ki pyntrei ia kano kano ka kam, kidei ban bianng ki tiar ki mashin namar ka pisa ka dei jong ki paidbah ym jong ki shimet,” ula ong.U la pynkhreh ban ujor ejahar ia kiba bat ia ka RTI namar ba da ki spah tylli ki RTI kiba u la pan na ki ophis sorkar, ki khlem ai ia ka jingtip ha ka por kaba biang.
