Ka National People’s Party (NPP) hynne ka sngi ka kam ka la ioh 31 ngut ki MLA bad kane ka la pynlong ia ka NPP ban bud paid hapoh ka iingdorbar thawain ba 60 ngut ki dkhot ka Jylla. Kane ka long hadien ba ka NPP ka la pdiang sngewbha ia 3 ngut ki MLA ka Congress hynne ka sngi. Ki 3 ngut ki MLA Congress ba la wan pyniasoh sha ka NPP ki kynthup u MLA ka Nongstoin constituency u Bah Gabriel Wahlang, MLA ka Mawhati u Bah Charles Marngar bad u MLA ka Umsning constituency u Dr Celestine Lyngdoh. Ia kine 3 ngut ki MLA ka Congress la pdiang da u National President ka NPP u Conrad K Sangma u Myntri Rangbah ka Jylla ha ka jingdonlang ki nongialam rangbah ka Party ba kynthup ki Symbud Myntri Rangbah u Bah Prestone Tynsong bad u Bah Sniawbhalang Dhar, ki Myntri Sorkar, ki MLA bad MDC ka NPP. Ki 3 ngut ki MLA ki la leit aiti ia ka shithi sha u Lamphang ka iing dorbar thawain ka Jylla u Thomas A Sangma, kaba pynpaw ia ka jingleit iasnoh lang noh bad ka NPP. Lah ban kdew ba ka Congress ba don 4 ngut ki MLA hadien ka jingiehnoh kam u MLA ka Gambegre Saleng Sangma uba la jop ia ka ilekshon MP-Lok Sabha na Tura, ka la don mynta satang uwei u MLA hapoh ka ingdorbar thawain kata u Bah Ronnie V Lyngdoh MLA ka Mylliem constituency.
Haba kren ha kane ka sngi u Nationla President ka NPP u Conrad K Sangma uba dei ruh u Myntri Rangbah ka Jylla ula ong, “Nga ai khublei ia baroh ki nongialam ka NPP kiba la donlang bad ka Party bad ha kajuh ka por nga ai khublei ia baroh 3 ngut ki MLA kiba la wan pyniasoh ia lade bad ka Party”. U Conrad ula ong ba kane ka jingwan pyniasoh ki MLA kan nang pynkhlain shuh shuh iaka NPP bad haka juh ka por ban pynkhlain iaka Sorkar ban nang trei bha shuh shuh naka bynta ka bha ka miat ki paidbah bad ka Jylla baroh kawei. Haba kylli u Myntri Rangbah ula ong “Naduh bas dang ka Party kala kren shai ba kim dei ban wan pyniasoh bad ka NPP naka bynta ka jingmyntoi shimet ne ban ioh bor bad nga kmen ban pyntip ruh ba ki MLA ruh kila kren shai ba kim wan iasoh bad ka NPP naka bynta ban myntoi ialade shimet”.
U Conrad ula pyntip ba ka jingwan iasoh ki 3 ngut ki MLA ka Congress bad ka NPP ka dei thik na ka bynta ban jingmyntoi ki paidbah ha la ki constituency. “Ki 3 ngut ki MLA ka Congress ki wan iasoh bad ka NPP kaba ialam ia ka Sorkar Jylla ka dei na ka bynta ka jingmyntoi ki paidbah bad ki constituency kiba ki mihkhmat” ula ong.Na ka liang ki MLA kiba dang shu wan pyniasoh bad ka NPP, ki la ai khublei ia ki nongialam ba rangbah ka Party naduh u Conrad K Sangma, u Bah Prestone Tynsong bad u Bah Sniawbhalang Dhar bad kila pynpaw ba kin nang trei bha shuh shuh ban nang pynkhlain iaka Party.
