Ka Khasi Students Union bad ka Jaintia Students Union kila pynrem jur bad pynpaw ka jingbynniaw halor ka jingbym jubab ka National Testing Agency (NTA) haduh mynta ia ka jingujor halor ka kynrum kynram ia ka jingpynlong eksam NEET ha ka jylla Meghalaya.Katkum ka kyrwoh khubor kaba la phah da u General Secretary ka JSU u samla TR Suchen ula pynpaw ba halor ka jingthurmur ka rukom pynlong eksam NEET ha Jowai bad ha Nongpoh Center ym duna ia ka 500 ngut kiba lah thoh ia kane ka eksam bad na ka liang ka seng JSU bad KSU ryngkat bad ki khynnah pule kiba thoh ia ka eksam NEET, ki lah phah da ka shithi ujor sha ka NTA bad sha ka sorkar jylla ban pan jingshai ha ka rukom pyniaid eksam ha kine ki ar tylli Center hynrei mynta lah kumba 2 taiew tam ruh, kim shym la ioh satia ia kano kano ka jubab na ka NTA bad kane ka buh ha ka umdum ia ki khynnah kiba ileh ia kane ka eksam.
U nongialam ka JSU ula pyntip ba hynin ka sngi, ki la pynlong ia ka jingialang ha Jowai ha kaba la wan ban iashim bynta da ki khynnah kiba thoh ia ka eksam NEET bad ki kmie ki kpa jong ki ryngkat bad ki nongialam JSU bad KSU na West Jaintia Hills District Unit.
Katei ka jingialang ka ia pynrem jur ia ka sorkar jylla namar ba kiwei ki jylla kum ha Telangana bad ha kiwei pat ki jylla, ki lah ioh ia ka jubab na ka NTA halor ka jingthurmur ka rukom pynlong ia ka eksam NEET kaba lah dep, hynrei ka sorkar jylla Meghalaya tad haduh mynta, kam pat ioh jubab na ka NTA bad kila dawa tyngeh na ka sorkar jylla ba kadei ban iakren bad ki heh ka NTA na Delhi halor ka kaiphod kaba ka lah phah napoh ka jylla Meghalaya bad ka NTA ka dei ban jubab kloi namar ka Result NEET jong mynta u snem ka lah jan mih.
