U nongniah jong kawei ka trok kaba kit ia u clinker u la sahkut ialade kumba ar kynta tad haduh ba ki kjat jong u ki la kdiah noh, kata hadien ba ka trok kaba u niah ka la leit ban tynrah pat ia kawei ka trok kaba ieng na ki bynta ba shadien tad haduh ba kane ka trok ka la pra phom na ki bynta ba shakhmat. Kane ka jingjia aksiden ka la jia hynne ka step ha ka por 4 shiteng eiei ha u surok bah National Highway 06 ha 12 Mer hajan Jorabat Ri Bhoi District. Utei u nongniah u ba la mynsaw jur na ki bynta ki kjat hadien ba u la sahkut hapoh ka kali kaba la pra phom la tip kyrteng da u Hanpaia Laloo na ka shnong Rakabab, West Jaintia Hills.
Katkum ka khubor ba la iohlum, la iathuh, ba kane ka jingjia tyngkhuh kali ka la jia namar ka jingpynher sted da u nongniah jong ka trok kaba kit clinker kaba don ia u number ML 11 A 1436 bad hamar ba poi ha katei ka jaka u nongniah um shem la lah ban tehlakam shuh ia la ka kali bad ban leit tynrah pat nadien jong kawei ka trok kaba don ia u number NL 01 AD 5135 kaba ieng harud surok namar ka jingthut ha ka kali.
Ki pulit ka Byrnihat Outpost kiba la poi ha katei ka jaka, ha ryngkat ki bor pulit ka Fire and Emergency ki la iakhun ban ioh sei ia u tei u nongniah ba la sahkut hapoh ka trok kaba la pra phom bad da ka jingpyndonkam da ki 3 tylli ki kali khwai la lah ban sei noh ia u ne u nongniah hadien 2 kynta eiei bad la pynkit noh ia u sha GMHC hospital Guwahati.
