Kum shi bynta ka Press Conducted Tour ha ka Jylla ba la pynlong da ka ophis jong ka Directorate of Information & Public Relations Meghalaya, Shillong naduh ka 16 tarik mynta u bnai haduh ka 31 tarik, kata ban ialam ia ki nongthoh khubor kylleng ka Jylla ba kin sakhi katto katte ki project bad kam pynroi ba kham donkam eh naka bynta ban wanrah khubor sha u paidbah, kumta halor kane ka thong la sdang nyngkong ha East Jaiñtia Hills District hynne ka sngi. Ha East Jaiñtia Hills District hynne ka sngi hapoh ka jingialam i kong Noviana Passah Public Relations Officer, Directorate of Information & Public Relations Meghalaya, Shillong bad u E.S War, District Public Relations Officer, East Jaiñtia Hills District, Khliehriat ki nongthoh khubor kila iohlad ban leit sakhi ia artylli ki project bala pyntrei daka tnat Soil & Water Conservation Khliehriat, East Jaiñtia Hills District, kawei dei ka RCC dam ne jaka pyllang um bala shna haka wah Umthning kaba don ha shnong Iapmala, katba kawei pat dei ka Mayawaki Afforestation ha Wahlam jong ka shnong Byndihati. Ka RCC dam bala shna haka wah Umthning dei kaba la bei pisa daka NABARD lyngba ka Rural Infractucture Development Fund jong u snem 2022-2023 haka mang tyngka ba 20 lak, khnang ban pynpoi um shaki pyrthor rep kba ba don kham sharum ne ki nongrep kiba don kumba 6,7 ïing.
Bad na kane ka mang tyngka ba 20 lak u F.Syiemiong Divisional Soil & Water Conservation Officer EJHD u iathuh 7 lak la pynlut naka bynta ka RCC dam, 8 lak ban pynpur pipe bad shna nala shaki jaka rep, 1 lak naka bynta ban shna pynheh iaki jaka rep, nalor ba don saka infrastructure development fund kaba ki ioh lang bad kane project ha kaba kila shna iaka lynti iaid kjat ki nongrep naka bynta ban jam shiliang iaka wah rit ban poi sha kine ki jaka rep. Kane ka dam dei kaba la pyndep mynta hi u snem bad lyngba ka jinglah ban pynpoi um haduh kumba 5, 6 hectare sha kine ki jaka rep kumta la pynheh shuh shuh ki jaka rep, bad naka liang u F.Syiemiong mynta u khmih lynti baki nongrep kin lah ban pynmih khambun u khaw la kumno kumno 200 Quintal na kaba ki juh ioh 150 quintal. Ha kajuh ka por ruh lyngba ka jinglah pynpoi ia kane ka um ki nongrep kila lah ruh ban rep iaki jingthung wat haka por tlang . Na ka liang ki nongrep kiba la donlang ha kane ka sngi ruh ki kubur ba kane ka dam kala iarap shisha ban pynbiang um iaki, bad watla wym pat dei ka por ot kba ruh ki ong ba ka jingheh jingsan u kba mynta u snem ka pher na kaba mynshwa ba duna um. Hadien kane pat ki nongthoh khubor kila leit jurip sa iaka project Mayawaki Afforestation ha Wahlam kaba hap hapoh ka shnong Byndihati kaba dei ka project thung dieng, ha kaba la sakhi iaki dieng bala thung sawdong kane ka jaka ryngkat ka jingkren sainar kum ka lad jingiada, katba ka bynta ba lait hapdeng pat dei kaba juh tih dewiong mynshwa bad naka liang ki nongialam shnong ki iathuh ba kila thmu ban tep noh iaka bad lah ban shna daka madan ialehkai Sports ha kane ka bynta ba long pdeng namar kane dei ka jaka jong ka shnong.
Haba iakren bad ka R.Laloo Senior Asst Soil and Water Conservation Officer, Khliehriat EJH, ka ong ia kane ka project la mang tang haki jaka bala syllen khnang ban pynim biang iaka khyndew kumjuh ki jingthung bad jingthaw ba im kiba la duh noh, ha kajuh ka por ruh ba ki briew kin ioh iaka lyer bakhuid nalor ban pynsngewthuh halor ka jingdonkam kaba thung dieng. Ki jait dieng ba thung ha kane ka jaka dei kiba juh don hi sha kane ka thaiñ namar la sngewthuh 80% haduh 100% ki lah ban im ha kine ki jaka namar ki iahap bad ka jinglong ka mariang, kiba kynthup kum ki Diengngan, Deingdoh, Champa, Puma, Latuthing bad kiwei, nalor ba ki pyrshang ruh 10% da ki jait dieng ba im shapoh Dkhar.Ka iathuh ruh ia kane ka project kila sdang ha u bnai May 2024 bad ha East Jaiñtia ia kane ka skhim dang tang ka tnat Soil hi bala leh. Naka sanction ba 8.25 lak shi hecter, la pyntreikam 3 hectar ha kane ka shnong Byndihati katba 2 hectar pat ha shnong Lee Lad bad ki tynrai dieng pat dei ban thung 30 hajar tylli shi hector. Na ka liang ki nongialam shnong Byndihati ki pynpaw ka jingsngewkmen halor ka jingwan kane ka project da kaba khmih lynti ba ka shnong ka thaw kan jyrngam biang, kumba maki ruh naka liang ka shnong kila pyrshang ban pynneh pynsah katto katne ki khlaw naduh ki por mynshwa.
