U Myntri Rangbah ka Jylla Conrad K Sangma hynne ka sngi ula pynpaw ka Sorkar kan shim ia ki lad ban pynsngewthuh ia ki paidbah halor ka “Meghalayan Age”. Ia kane ula pynpaw ha ka jingialang ban sam jingiarap na ka CM-ELEVATE bad FOCUS ha Shillong bad la iashim bynta Online ruh na kiwei pat ki District bad ki Block jong ka jylla. Ia katei la ai jingmut da uwei u nongsengkam lajong uba na ka shnong Mawmluh, East Khasi Hills, ha kaba ula ong ba ia ka “Meghalayan Age” la iakren salonsar da ki Geologist bad kan bha shibun lada ki briew ba kin tip shaphang ka jongka. Ha ki 4200 snem mynshuwa, la dep ban ithuh kum ka juk Meghalayan Age, kaba pyni ia ka por kaba kyrpang ha ka histori jong ka Pyrthei. Ki nongwad bniah ki la kdew bin pa bin, ia ka jingsdang jong kane ka juk na ka jingtyrkhong kaba la jia ha ki por hyndai hynthai. U Conrad ula tyrwa ia bun tylli ki sienjam ban pynsngewthuh paidbah, kaba kynthup ia ka jingpynmih ia ka ‘Documentary Film’ ka ban ngam jylliew bad batai katkum ka jingstad saïan kaba la lap na ka jingtih bniah bad kane ka film kan ai jinghikai ia ki paidbah shaphang ka jingkongsan jong ka jingling jingman jong ka pyrthei ha kaba iadei bad ka juk Meghalayan Age.
Ha katei ka prokram, ki nongrep kila pynpaw ia ka jingsngewkhia ha kaba iadei bad ka jingpyniasoh bad ki iew ki hat, ka jingpyniaid ia ka Focus bad Focus+ Financial bad kiwei kiwei. Uwei u nongioh jingmyntoi ula pan ia ka jingpynshai na u Myntri Rangbah ha kaba iadei bad ka jingkyrshan pisa kaba la ai sha ka kynhun ki nongrep lyngba ka Focus bad Focus+, ha kaba u Myntri Rangbah ula pynshai ba ka pisa kaba la ai sha ki kynhun kadei ka grant bad ka subsidy bad kam dei satia ka ram. Ula pyntip ruh shaphang ka schemes kum ka CM-Elevate, kaba don ia ka ram, kaba pyniasoh bad ki Bank ki bapher bapher bad ka CM-Elevate ka ai iaka Grant in Aid haduh 70 percent na ka jinglut jongka projek baroh.
Ha kane ka sngi u Conrad Sangma ula sam ia ki Cheque sha ki nongioh jingmyntoi na ka skhim FOCUS bad CM-ELEVATE bad pyllait paidbah ia ki kali Tourism ba la mang lyngba ka CM-ELEVATE ha ka jingdonlang ka Myntri ka rep ka riang ka Kong Ampareen Lyngdoh, u Myntri ka Tnad Veterinary & Animal Husbandry u Bah AL. Hek, ki heh ophisar sorkar bad kiwei kiwei.
