Ia ka prokram ban sam khusnam na ka bynta ka Jingiakhun Halor ka Deiriti kaba 50 la pynlong ha ka 31 tarik u Nailar ha ka por 3 baje nohphai sngi ha ka Ramakrishna Mission Vivekananda Cultural Centre, Quinton Road, Shillong ha kaba la don 269 (ar spah hynriewphew khyndai) ngut ki nongjop khusnam na 55 tylli ki jaka ai jinghikai ha Shillong bad Sohra ha kane ka sngi. Ka Ramakrishna Mission, Shillong ka la pynlong ia kane ka jingiakhun man u snem la sanphew snem mynta ha kaba ka ai rynsan ia ki khynnah ki samla ba kin pyni ia la ka sap. La don palat 3300 ngut kiba la pynrung kyrteng ha ki jingiakhun na 89 tylli ki jaka ai jingpule bad 2072 ngut ki la jingiashim bynta ha kine ki jingiakhun.
U C. H. Vijayashankar, Lat ka Jylla Meghalaya, u la wan iashim bynta ha kane ka prokram kum u kongsan. U la kdew sha ki kyntien jong u Swami Vivekananda bad u la ong ba u sngewkmen ba u ioh lad ban ai jingkren na kane ka juh ka rynsan ba la pynkyntang da u Swami. U la kyntu ia baroh ba kin don ka jingpynleit jingmut kumba la hikai u Swami Vivekananda kaba lah ban iarap bha ia ki. U la iarohia ki sienjam jong kito kiba la pynlong ia kane ka jingiakhun la 50 snem mynta.
U Swami AchyuteshanandajiMaharaj, dkhot ka governing body, Ramakrishna MissionBelur Math, u la pynkynmaw ia baroh shaphang ki jingai jingshakri jong ka Ramakrishna Mission khamtam ha Meghalaya ha kaba ka la trei ban pyniajan ia ki jaitbynriew. Ka jinglong jingman jong kane ka jaka bad ka jingpdiang jong ki briew jong ka ki dei ka nuksaia baroh kawei ka ri. Kiwei kiwei ki kynrem ki lyndan ki ba la wan iashim bynta lang ki kynthup ia u Bah Osmond Ewen Jyrwa Nongbri, Managing Director, The Meghalaya Co-operative Apex Bank Ltd, Shillong uba la pynpaw ia ka jingkmen ban ai jingkyrshan ia ki khynnah bad ki samla jong ka nongbah kiba don sap.
Ha ka jingai jingkren sngewnguh, u Swami Vedeshanan da Maharaju la pyntip ia baroh ba u snem 2024 u long uba kyrpang, namar kum shi bynta ka Golden jubilee jong kine ki jingiakhun halor ka deiriti, ka long ruh kum ka dak jong ka jingdap 100 snem ka jingai jingshakri ka Ramakrishna Mission ha Meghalaya.
Hashuwa kane, u Swami HitakamanandajiMaharaju la pdiang sngewbha ia baroh bad u la ong ba kine ki jingiakhun ki dei khnang ban pyntbit shuh shuh ia ki khynnah kiba don sap bad ruh ban wanrah ia ka jingskhem jingmut ha ki.
