Sam shithi thungkam u MR sha 346 ngut ki nonghikai LP

U Myntri Rangbah ka Jylla Conrad K Sangma ula sam ia ki shithi thungkam sha ki 346 ngut ki nonghikai Lower Primary School ha ka jingialang kaba la long ha State Convention Centre.
Ha kane ka jingialang u Myntri Rangbad ryngkat ka jingdonlang u Myntri ka Pule Puthi u Rakkam Sangma kila pyllait paidbah ruh iaka Teaching Learning Materials Kit kaba la tip kum ka ‘Jadui Pitara’ na ka bynta ki Khynnah rit ba dang leit skul nyngkong, ha kaba 35000 ngut ki heprit kin ioh ia kine ki tiar pule na ki nonghikai LP School ha ka sngi ba sdang skul.
Haba kren ha ka jingialang, u Conrad K Sangma ula ong, ba kane ka prokram kam dei eh tang ban sam ia ki shithi thungkam sha ki Nonghikai LP School kiba dang shu iohkam hynrei ka dei ruh ka sngi ban pynsaphriang iaka thong bad ka jingangnud jong ka Sorkar Jylla.
“Ngi baroh mynta, ngi ia donlang ha kajuh ka kynhun, ngi lah ban leh ia ki kam ki bapher bapher ha ki kyrdan bapher hynrei ngi don hangne ban kynjoh ia kajuh ka thong kata ban pyniaid shakhmat ia ka Jylla jong ngi” ong u Conrad.
Ula ong, ba ka jingbei tyngka ha ka pule puthi kadei ka jingbei tyngka kaba heh tam bad ka long kaba donkam iaka jylla kaba don iaka jingangnud ban don iaka jingbei tyngka haka liang kaba dei ban tei ia ki bynriew ka long kaba kongsan khnang ba kan don ka jingseisoh.
Nalor kane, u Conrad ula kyntu ruh ia ki nonghikai kiba dang shu iohkam ba kin sdang iaka kam ka jongki da kaba don iaka jingmut kaba bha bad kum ki nonghikai kim dei eh tang ban shu ai jinghikai hynrei kidei ruh ban wanrah iaka jingkylla ha ka jingim ki khynnah hapoh ka jingsumar sukher ka jongki.
Katba u Rakkam A Sangma ula ong, ba ka kam hikai ka dei ka kam kaba don burom bad ki nonghikai kidei ban ai ka jingshakri da kaba trei met bad mynsiem namar ki nonghikai ki don ia ka bor ban wanrah ia ka jingkylla bad ula maham ruh ia ki nonghikai ba kim dei ban phah hikai bujli ha ka jaka ka jongki da kiwei pat ki nonghikai namar kane kan ktah jur ia ka pule puthi jong ki khynnah bad kan pynhiar ruh ia ka kyrdan ha ka pule puthi.