U MLA ka nongpoh konstituensi bah Mayralborn Syiem hynnin ka sngi Palei ula leit sha saw tylli ki shnong ha Nongpoh Konstituensi kynthup ïa ka shnong Umden Khasi, Umden Nongtluh, Umdohkha Lum bad sha ka shnong Mawlong Nongtluh na ka bynta ban ai kam pynroi lyngba ka skim MLA ba la tip ka Special Rural Work Program (SRWP) na bynta ka jingdonkam ki shnong.
Ki kam pynroi ba u MLA ka nongpoh u la ai ki kynthup ka Dorbar Shnong Umden Khasi na bynta ban pynheh ïa ka ïing Dorbar Hall ba la pynmang lyngba ka skhim SRWP 2023-24 ha ka jinglut ba 3 lak tyngka, nangta ula leit pat sha ka shnong Umden Nongtluh ban ai work order ba 2 lakh tyngka na ka bynta ban tei ïa ka Cemetery shet jong ka Umden Nongtluh na ka skhim SRWP jong u snem 2023-24.
Hadien katei ka program ba la long ha Umden, Nongtluh u MLA ka nongpoh ula leit sha ka shnong Umdohkha Lum ban ïakynduh ïa ka kynhun ki longkmie ka Balang Presbyterian ban ai ka work order kaba 2 lak tyngka lyngba skhim SRWP u snem 2023-24 na bynta ban shna kynroh bad pynitynnad ïa ka Ïingmane.
Ha kajuh ka por ula leit ruh sha ka shnong Mawlong, Nongtluh ban iakynduh ïa ki nongshong shnong naduh ki nongïalam shnong bad ki shnong ba marjan, ki nongkitkam ka Balang Presbyterian, Mawlong bad ïa ki ophisar na ka tnad PWD Road, Nongpoh ban ïakren ia ki jingdonkam shwa ba ka Balang Presbyterian Mawlong kan pdiang ïa ka Jubilee jong ka Nongtluh Mathan Presbytery ha u bnai Rymphang, 2025.
Haba kren na ka liang u MLA ka Nongpoh, u la ïathuh ba kum u Nongmihkhmat ka Nongpoh Konstituensi u don ïa ka jingbahkhlieh ia ka jingbit pynbiang ha shwa ba ka Balang Presbyterian, Mawlong kan pdiang ïa katei ka Jubilee.
Ula pynpaw ka jingkhublei ïa u Myntri ka sorkar jylla ba dei peit ia ki kam surok, u bah Prestone Tynsong ba ula sngap ïa ka jingdonkam katei ka shnong na ka bynta ban pynbha bad ban siang thymmai ïa ka surok shnong ba don ïa ka jingjlan ba 2.7 kilometre. Ha kaba na ka liang u MLA ula pyntikna ba ïa katei ka kam ban siang noh ïa u surok yn ioh ban sdang noh ha u taïew ban wan khnang ba kan ym don kano kano ka jingthud ha ka jingpynkhreh ban pdiang ïa katei ka jingïaseng heh.
U bah Mayralborn Syiem u la ïathuh ruh ba ha katei ka jingïalang la ïoh ruh ban ïa kren pynbeit naduh ka jingpynbit pynbiang ïaka umbam umdih, ki bor jingshai ha kaba ïadei bad ki Street Light, ka jingpynbit pynbiang ïaka madan bad ïaka jaka ban pynïeng ïaki kali kiba wan sha katei ka jingïaseng.
Ka jingkynduh u Bah Mayralborn ïa ki ophisar na ka tnad PWD bad ïa ki nongialam shnong bad ïa ki nongkitkam ka Balang Presbyterian, Mawlong ka dei halor kitei ki mat khnang ba ka jingpynkhreh ban pdiang ïa katei ka jubilee kan ïaid shait shait khlem kino kino ki jingpynthud.
Nalor kitei ki mat, u bah Mayralborn Syiem ula ïathuh ruh ba la ïoh ban ïakren kyrpang ruh halor ka jingthmu ban wan rah ïa ka Sub-Center ha ka shnong Mawlong ha kaba ula pynpaw ïa ka jingkhublei ïa ki nongïalam shnong ka shnong Mawlong bad ka shnong Umterlen ba ki la long kloi ban ai sngewbha ïa ka jaka na ka bynta ban tei ïa ka Sub-Center ban jingmyntoi ïa ki paidbah nongshong shnong.
U Bah Mayralborn Syiem u la ai khublei ruh ïaka tnad jong ka koit ka khiah hakaba ïa katei ka Sub-Center yn bei tyngka lyngba ka National Health Mission NHM hakaba naka liang ka sorkar kan sa pynpoi ïaka jingiarap sha ka Village Health Committee VHC jong ka shnong ban sdang ban pyntreikam noh ïa kane ka kam.
U bah Mayralborn u kitbok kitwriang ruh ïaka VHC ba kan lah ban ban sdang noh ïa katei ka kam khnang ba kan long ka jingmyntoi kaba khraw naka bynta ka shnong Mawlong lem bad kiwei kiwei pat ki shnong kiba don marjan khamtam ïaki longkmie kiba armet ki ban sa ioh ïaki dawai inject na kane ka Sub-Center lem bad kiwei kiwei ki dawai ki ban jingsumar ïa kiwei kiwei pat ki jingpang ki ban sa ioh na katei ka Sub-Center.
