U Lahkmen Rymbui MLA ka Amlarem Constituency uba dei ruh u nongaibuit ka sorkar Jylla, hynne ka sngi ula sam Mobile Tablet sha ki ASHA ba hap hapoh ka Amlarem Block, West Jaiñtia Hills District, kum shibynta ban pynsuk ia ka rukom treikam jong ki ASHA, khamtam eh na ka bynta ban peitngor ia ka koit ka khiah ki briew ba la palat 30 snem ka rta haba ia dei bad ka BP, Diabetes, Cancer bad kiwei ki jingpang.Ha ka jingialang sam Mobile Tablet ba la pynlong ha ophis treikam u Block Development Officer Amlarem C&RD Block la donlang ruh u Dr.Abishek Saini SDO Amlarem Civil Sub-Division, u G.L.C.Mylliem BDO Amlarem C&RD Block, Dr. Kin Dhar DM&HO, WJH, Dr. Maria Syngkon District Nodal officer Communicable Disease Control Programme NCDCP, u Dr Arvind Khonglah, Block Medical Officer Amlarem bad kiwei.
U Dr.A.Khonglah u ong, kane dei ka sienjam ba nyngkong jong ka CBAC ne Community Based Assessment Check list, ban peitngor ia ka koit ka khiah ki briew ba la palat 30 snem dei ruh ban pynrung ia ka kyrteng jong ki hapoh ka Portal jong ka Non Communicable Disease lyngba ka Apps ba la don ha kane ka Mobile Tablet ia kaba la buh ryntih da ka Health Ministry ka sorkar kmie.Ia kane ka CBAC yn leh da ki ASHA bad ka jingpynrung kyrteng kan pynsuk bad pynstet ia ka jingtreikam jong ki, ki paidbah ba leit mih sha ki jaka ai jingsumar bapher bapher ruh ki suk ban wad ia ka kyrteng jong ki tang lyngba kane ka Apps.
U Lahkmen Rymbui u ong, kane dei ka sngi ban sah kynmaw ba lyngba ka sienjam ba la shim da ka sorkar la ioh ban sam ia ki Tablet sha ki ASHA khnang ba ka jingtreikam jong ki kan sted bad ki paidbah ruh kin ioh jingiarap ha ka por kaba biang. Ha kajuh ka por u kyrmen kane kan iarap ia ka sorkar ban ioh jingtip, namar ba ka thong ka sorkar ka long baroh kiba 30 snem shaneng dei ban peitngor ia ka koit ka khiah jong ki. Ula bynrap ka Amlarem dei ka Aspirational block hapoh ka Jylla kaba dang donkam shibun ban kyntiew ha ka koit ka khiah bad jingnang jingstad.
