Sdang ai injek Anti-Rabi ki bor district ban iada na ka jingpang shah dait ksew

Ka bor District ka East Khasi Hills ka la shim ia ka sienjam ban ai jingleit ai injek Anti-Rabi ia ki ksew ha kylleng ka Nongbah Shillong, ban iakhun pynduh jait ia ka jingpang rabi hapoh ka District. Ia kane la leh da ka District Joint Steering Committee on Rabies Elimination ka East Khasi Hills haka jingiatreilang ki bor District, ka Tnad ka Koit ka Khiah, ka tnad Veterinary, Shillong Municipal Board, ki Seng trei mon sngewbha bad ki Dorbar Shnong.

Ka jingai injek ia ki ksew kynthup naduh kiba ri ki briew bad ki ksew surok, ka la sdang naduh ka 11 tarik Lber bad ha kine hynriew sngi ba la leit noh, la dep ai injek haduh 631 tylli ki ksew ha kylleng ki shnong ka Nongbah Shillong. Ki bor District ki pyntip ba ka jingshah dait ksew ki briew ha Jylla ka la kiew bha hapdeng kine ki shisnem ba la leit noh, kaba la kiew na ka 5302 ngut ha u 2022 sha ka 9611 ngut ha u 2023.

Ka East Khasi Hills District ka dei kaba don bun eh ki jingjia shah dait ksew kaba don haduh 50% ki kes, ha u snem 2022 haduh 2512 ngut ki la shah dait ksew bad ha u 2023 ka la kiew sha ka 5085 ngut bad haduh 80% na kine ki jingdait ksew ki dei kiba jia ha jaka sor. Katkum ka jingong ki bor ka koit ka khiah, ka jingdait lane ka jingkhlong ne ka jingjliah ia ki dak mong ha ka snieh doh da ki ksew ba don khniang rabi, ka lah ban pynbit jingpang ia u briew bad ktah ia ka jabieng bad u budlum nalor ka dei ruh ka jingpang kaba lah ban shim wat ia ka jingim briew.

Ki la ong ba ka jingpang rabi ka dei pat kaba lah ban iada 100% bad ki jingiada kiba dei ban shim ka long ban sait wut wut ia ki jaka ba shah dait da ka sabon hapoh ka um ba tuid kumba 15 minit eiei bad sa leit wad ia ki jingsumar ha ki jaka sumar ba marjan ba kin ai ia ki dawai injek. Ki la ong ruh ba ia ki ksew ba suba don jingpang rabi, ym dei satia ban pyniap hynrei ban teh ia ki bad ban peit thuh haduh 10 sngi bad pyntip ruh sha ki bor ba dei khmih.