Ki shipai jong ka ri India bad ri Mongolia hynne ka sngi ki la iashim bynta lang ha ka Joint Military Exercise “Nomadic Elephant” kaba la pynlong ha Foreign Training Node, Umroi.
Kane ka jingai jinghikai pyntbit ia ki shipai kala sdang hynne ka sngi bad kan kut ha ka 16 tarik u Naitung 2024 bad ka jingthmu jong kane ka jingai jinghikai ka long ban ia sam mar kylliang ia ki jingnang jingtip bad ka jinghikai ia ki shipai khnang ba kin long kiba tbit.
Kila don 45 ngut ki shipai na ka Sikkim Scouts bad nakiwei ki tnad shipai bad 150 ngut ki shipai jong ka Quick Reaction Force Battalion jong ka Mongolian Army kila iashim bynta ha katei Joint Military Exercise.
Ia kane ka jingai jinghikai la pynlong man la u snem hapdeng ka ri India bad Mongolia bad ka sien kaba khatduh ba la pynlong ia kane ka dei ha u Naitung 2023 ha Mongolia.
Kane ka jingai jinghikai kan pynleit jingmut ban ai jinghikai ia ki shipai ha ki kam khynra ha ki jaka khapsor, ki jaka lum bad ki riat bad kin don ki bynta ba yn ai jinghikai ruh ban iakhun pyrshah ia ki kam pyntriem jong ki lehnoh bad ban don ka jingiatreilang bad ka jingpeitngor bad kumta ter ter.
Ia kane ka Joint Military Exercise la plie da u Nongkittien Syiem ne u Ambassador ka ri Mongolia sha India, u Dambajavyn Ganbold ha kaba la iadonlang u Major General Prasanna Joshi uba long u General Officer Commanding jong ka 51 Sub Area jong ka Indian Army.
U Nongkittien Syiem ula ong, kane ka joint military exercise kadei ka lad kaba ki shipai na baroh ar tylli ki ri kin ioh jinghikai bad jingpytbit bad kane kadei ka sien kaba 16 ba la pynlong ia kane ka jingai jinghikai.
U Ganbold ula ong ba ka ri India bad Mongolia ki la tei ia ka jingiadei kaba iajan da kaba pynshong nongrim ia ka kolshor bad ka jingngeit katkum ka histori ka jong ki bad kane ka Exercise kan wanrah ia ka jingiadei hapdeng ki shipai na kine ki ar tylli ki ri.
Ula ong ba ka ri Mongolia ka dang trei ha ka polisi jong ka kaba la tip kum ka “Third Neighbour” bad ka ri India ka dei kaba la kynthup lang ha katei ka polisi treikam bad ki ri kiba nabar bad ula ong, namar ka jingdon jingma ia ka thaiñ bad ia ka pyrthei baroh kawei, kumta ka ri Mongolia bad ka ri India ki la don ia ka jingiatreilang kaba iajan bha ban don ia ka jingshngaiñ.
Ula ong, ba ka ri India bad ka Mongolia ki la pynneh pynsah ia ka jingiadei ka jong ki naduh u snem 1955 bad kin sa rakhe ia ka jingdap 70 snem jong ka jingiadei ha u snem 2025.
