Ka Kyrmen Foundation ryngkat ka jingiatreilang ka Rangdajied United Football Club haka 4 tarik mynta u bnai kala sdang iaka shlem ai jinghikai ba khlem jingsiew naka bynta ki khynnah ka East Jaiñtia Hills District kiba don sap haka jingialehkai phutbol naduh ka rta ba dang khynnah. Ia kane ka shlem ai jinghikai latip kum ka Kynsai Football Coaching Program ka ban neh shisnem lynter naka bynta 200 ngut ki khynnah, bad ki khynnah ki ban shah hikai dei kiba la dep jied kynsai lyngba ka trail bala pynlong haki khyndiat bnai.
Iaka jinghikai ne Coaching Program la pynlong ha madan ialehkai ka Deiñshynrum, East Jaiñtia Hills District, bad yn ai jinghikai iaki daki Coach bad Staff ka Rangdajied United Football Club. Ka thong hi jong ka Kyrmen Foundation lyngba kane ka free coaching ka long ban pynjanai shuh shuh iaka sap ialehkai phutbol haki khynnah khnang ban ioh sei biang iaki ryngkynsai napoh ka thaiñ East Jaiñtia ki ban mihkhmat iaka Jylla bad ka Ri kum haki por mynshwa.
Ha kane ka sngi shwa ban sdang Coaching la don ka jingialang lyngkot naka bynta ban Kitbok kitrwiang iaki khynnah kynthei bad shynrang, ryngkat ka jingdonlang u Kyrmen Shylla myntri sorkar uba dei ruh u nongpynlut pynsep ia kane ka free coaching, u Eugeneson Lyngdoh, President ka Rangdajied United Football Club, ki MDC JHADC kynthup u Lasky Rymbai Dy CEM, u Finelyness Bareh, u Ex MLA Khliehriat Constituency u Justine Dkhar, kiba shah khot sngewbha, ki kmie ki kpa jong ki khynnah bad kiwei.
Naka liang u Kyrmen Shylla haba kren kum u kongsan u kyntu iaki khynnah ba kin shimkhia ia kane ka kabu ksiar namar ba ka sports hi ha kine ki sngi kala long ruh ka lad kamai jakpoh.Bad ha kajuh ka por u pynbna ba katba u danglong MLA un dang bteng ia kane ka coaching, bad un wad shuh shuh ki lad ki lynti naka bynta ban kyntiew ia kiwei pat ki sap ki phone jong ki khynnah. Kiba ai jingkren ha kane ka sngi kynthup u Eugeneson Lyngdoh, President ka Rangdajied United Football Club, u Dy CEM JHADC u Lasky Rymbai, u MDC Finelyness Bareh, kiba ai jingkren naka liang ki kmie ki kpa jong ki khynnah bad kiwei.
