Sdang khie samla biang ka surok Mawsynram : MLA 

U MLA ka Mawsynram u bah Ollan Sing Suin ula ong ba ka surok Mawsynram mynta ka la sdang ban kan khie samla biang hadien ba la pynkhreh ban pynbha ia ki surok bad kiwei ki kam pynroi. U bah Ollan haba mynta ka sngi u la pynpaw ia ka jingkyrmen ba ki shi snem ar snem ban wan, yn iohi ia ka jingkylla ha ka thain Mawsynram namar ba un iasaid ban wanrah ia ki kam pynroi naduh ka koit ka khiah, ka lynti syngkieng, ka pule puthi bad kumjuh ka rep ka riang. “Ka thain Mawsynram jong ngi, i kumba kan noh tymmen noh, mynta nga iohi ba kan khie samla biang”, ong u bah Ollando. U la ong ba ka la don ka jingpynkhreh noh ia ka surok na Weiloi sha Trongpleng kaba jngai kumba 32 km kaba la mang kumba T. 78 klur ban shna pynheh noh ia mynta kum ka Intermediate road watla ka don kam ban shna kum ka Two Lane.

U la pynpaw ia ka jingsngew bynniaw namar ka jinglong rit jot ka surok, lada iaid sha Mawsynram sngew kumba poi sha nongkyndong katba ynda la poi sha Ranikor namar ba ka bha ka surok, sngew kumba poi sha sor. Ha kajuh ka por, u la ong ba ka jingpynheh ia ka surok na Lad Mawreng sha Weiloi ka la dep haduh sharum Mawphlang bad kyrmen ban lah ban pyndep noh ha ka por kaba biang khnang ban pynsuk ia ka leit ka wan jong ki paidbah. U la ong ba ma u bad kiwei ki MLA kiba dei iaid lang na katei jaka kila iakren man ka por ia ki kontraktor bad ka sorkar ban pynsted ia ka kam.

U la ong ba ha kine ki shi snem ar snem ban wan, la kyrmen skhem ba yn iohi ia ka jingkylla bak ly bak ha ka thain Mawsynram namar ba un iasaid ban wanrah ia ki kam pynroi naduh ka koit ka khiah, ka lynti syngkieng, ka pule puthi bad kumjuh ka rep ka riang. “Ki la don ki kam pynroi kiba la wan kum ka jingshna ia ka Primary Health Centre ha Sawsymper, ka jingpynheh ia ki surok, bad kumjuh ka jingpynbha ia ki jaka jngohkai pyrthei. Ka jingsniew surok ka la pynngiah ia ki nongwankai ban hiar sha Mawsynram hynrei hadien ba la bha ki surok, ngi kyrmen ba ki nongwankai kin tuid sha Mawsynram”, la ong u bah Ollan.