U President ka Voice of the People Party, u bah Ardent Miller Basaiawmoit ula pynbna ia ka kyrtong ka kong Deiwi Tongper ban iakhun ilekshon MDC na Narpuh Constituency ha Jaintia Hills Autonomous District Council (JHADC). Ia ka kyrteng katei ka kyrtong ula pynbna ha ka jingialang paidbah ha ka sngi Saitjain ha shnong Umkiang, East Jaintia Hills District bad pyntip ba ia kiwei ki kyrtong yn pynbna shen hadien ba pynskhem ka State Election Committee ka VPP.
Ula ong ka party ka la bishar bniah bad rai ban pynieng ia ka kong Deiwi hadien ba ki la iohi ba ka don ka jingkitkhlieh ban shakri ia ki paidbah.
“Ngi sngewdei ban sei ia kane ka longkmie, namar ka VPP ka ioh jingkyrshan bha ki longkmie ha ka ilekshon MP ba la dep, kumba phi ai jingkyrshan ia ka VPP ha ka MP kyrmen phin pynjop don burom ia ka Kong Deiwi ha ka ilekshon MDC,”la ong u bah Ardent.
