Set phatok shi jingim ïa kiba pynïap ïa u heprit : Dawaka sur ki paidbah

Ki riew paidbah nongshnong shnong ka thain Ri Bhoi Sepngi ha ryngkat ki nongialam jong ki lai seng ba kynthup ia ka KSU, FKJGP Western Border Area bad ka RBYF, Patharkhmah Circle ki la pynmih ia ka sur jingdawa na ki bor ka ain ban shet phatok beit shyrta jingim ia ki riew thrang snam kiba la pyniap dusmon ia u heprit ba dang 10 snem ha ka shnong Umtangar ha ka thain Ri Bhoi Sepngi ia kane ka sur la pynmih ha ka prokram Signature Campaign bad ka jingthang mombati ba la pynlong ki 3 seng ha iew Patharkhmah. Nalor ki spah ngut ki riew paidbah kiba shong sah ha ka thain Ri Bhoi Sepngi, la wan ban shimbynta ha ka prokram leh sngewlem ia ka longiing jong u heprit Kitborlang Marbaniang (Bam Kwai ha Dwar u Blei) da ki nongialam ba kynthup ia u Bah Center Doloi President FKJGP, Bah Receive Pator President KSU, Samla Rishan Nongtri President RBYF Patharkhmah Circle, Bah Enias Ranee President Western Ri Bhoi Dorbar, Fr.

Michael Sun Parish Priest ka Umkadhor parish, Paiem H Wahlang Syiem ka Hima Jirang.Haba kren ha kane ka prokram, baroh ki nongkren ki la pynrem jur ia kane ka jingjia kaba sngewsih bad kaba sngewtriem kaba la jia ha ka 17 tarik u Rymphang ha kaba u heprit ba dang 10 snem u la shah pyniap dusmon ha ki riew thrang snam bad ia ka met la lap ha ka 18 tarik u Rymphang na kawei ka khlaw kaba don hajan ka shnong Umtangar.

“Kum kine ki jingjia ba sngew triem kim ju jia koit ha kane ka thain, hynrei kane ka jingjia kaba sngewsih ka la pynher syrngiew ia baroh ki nongshong shnong ka thain Ri Bhoi Sepngi bad ngi dawa jur na ki bor ka ain ba kin pynshitom da kaba tyngeh ia kiba donkti ha kane ka kam pyniap briew khamtam kat ia ka mynsiem ba khyllung ruh kim shem la mab ne don jingsngewbriew satia, kumta ngi dawa ba ki riew thrang snam ki dei ban shah set phatok shyrta jingim kum ka jingpynsajia ban rad dyngkhong ia kum kine ki riew thrang snam na kane ka thain”, pynpaw ki riew paidbah ha ryngkat ki nongkren.Ha kane ka jingialang, ki nongialam jong ki 3 seng ki la buh ruh da ka synduk ban lum ia u synniang na ka bynta ka jingsngewlem sha ka longiing jong u heprit Kitborlang Marbaniang.