Ka Hynniewtrep Achik National Movement (HANM) kan leit iakhih biang sha Delhi ha ka 25 tarik Rymphang 2025 ban dawa na ka Sorkar Pdeng ban pyntrei kam ia ka Inner Line Permit (ILP) hapoh Meghalaya bad ban pynrung ia ka ktien Khasi bad Garo ha ka khyrnit ba phra ka riti synshar ka Ri India. U President ka HANM bah Lamphrang ula iathuh ka HANM ka la ioh jingbit na ki Pulit jong ka Nongbah Delhi ba kin pynlong biang ia ka jingiakhih da ka shong kyllain mumgor ha Jantar Mantar.
U la iathuh ka HANM ka la pan jingbit ban pynlong jingiakhih shwa u bnai Rymphang 2025 hynrei namar ka ilekshon la hap ban rah syndon sha ka 25 tarik Rymphang.”Lyngba kane ka jingiakhih ka seng ka don ka jingkyrmen ba ka Sorkar Pdeng kan sngap ia ka jingdawa ban ai noh ia ka ILP bad kumjuh ban ai jingithuh ia ka ktien Khasi bad Garo” la ong u Bah Lamphrang.
U la bynrap ha ka jingleit ka HANM sha Delhi ka la ioh kynduh ia u Rakhesh Sinha u MP Rajya Sabha bad u heh ka BJP ba peit ia ka North East bad ha ka jingiakynduh ki la ai da ka dorkhas ban ai sha ka President ka Ri India bad sha u Myntri Rangbah Duh ka Ri. “Ha ka jingiakren u MP ula kular ban kren ia kine ki mat un sa rah hapoh ka Committee bad u la kular ba un sa wan sha Meghalaya ban ia kren ia kane ka phang kham bniah halor kine ar tylli ki mat jingdawa” u la ong.
