Ka Samsung India mynta ka sngi ka la pynbna ia ki 20 tylli ki kynhun na ka ri kiba la shah jied ban ioh rung sha ka lympung iakhun national ka bynta ka flagship CSR programme kata ka ‘Solve for Tomorrow’ 2024. Kine ki kynhun kiba la long kiba la pynkhreh ban iashim bynta ha ka lympung jong ka national, kidei kiba mih khmat na ki bynta bapher bapher jong ka rib a kynthup ia ki nongiashim bynta na ki 12 tylli ki jylla bad 2 tylli ki Union Territories ha kylleng ka India. Ki katto katne ki nongiashim bynta ki mih khmat na ki shnong kiba kyndong bha kum ka Imphal ha Manipur, East Khasi Hills ha Meghalaya bad Bilaspur ha Chhattisgarh.
Ha ka wat kaba 3 jong ka prokram, ki khynnah bad samla pule ki la ai ia ki jingmut hapoh ar tylli ki bynta— ‘Community and Inclusion’ bad ‘Environment and Sustainability.’ Kumba 20% na ki jingai jingmut ha ka thup jong ka school track ka phai khmat ha kaba iadei bad ka pule puthi bad kumjuh ruh ban ioh ia ki lad ki lynti na ka bynta kito kiba duna ha ka ioh ka kot, ki jingeh kiba iadei bad kumno ki khynnah kin ioh ban pyrshang ia kiei kiba la hikai bad ban tip shaphang ki digital. Kumba 25% na ki jingai jingmut ha ka thup jong ka youth track kadei shaphang kumno ban pynneh pynsah ia ka um, ka jingjaboh na ka daw ka arsenic, ka jingpynlut kai ia ka um, bad ka jingbym biang ha sawdong sawkun ha ki jaka ba don um. Nalor kane, jan kumba 40% jong ka jingai jingmut ka phai khmat ruh ban pynduna ia ka jingjaboh ka lyer na ka daw jong ki tdem kali, ka jingbym biang ki rukom ban pynkhuid ia ki jaboh jabain, bad ka jingkynrei ka jingpyndonkam ia ki plastic ba pyndonkam shisien, bad ka jingpluh ki khlaw ki btab.
“Ka Samsung’s flagship CSR programme, ‘Solve for Tomorrow,’ mynta u snem ka phai khmat kumno ban pynkup bor ia ki khynnah skul bad samla pule ha ki college ban wad ia ki sienjam kumno ban pynduna ne ialeh ia ki jingeh kiba ka pyrthei ka iakynduh ha kine ki sngi da kaba pyndonkam ia ki kor teknology. Mynta u snem ngi phai khmat ban pynshlur ia ka jingiashim bynta na ki shnong kiba kyndong bha ha ka ri, bad ngi sngewkmen ia ka jingiashim bynta jong ki khynnah bad samla pule na ki bynta bapher bapher jong ka ri. Ngi kitbok kitrwiang ia ka jingiaid lynti sha ka innovation walk ha ka ophis jong ngi bad ha ka R&D centre bad ha kaba khatduh ban iashim bynta haka national pitch event ha IIT Delhi,” ong I SP Chun, Corporate Vice President, Samsung Southwest Asia.
