Ki Pulit ka East Jaintia Hills hynne ka sngi ki la ioh kurup drok ba shongdor T.3.6 klur bad la kem ia 3 ngut ba suba donkti khaii drok . Ia kine ki nongkhaii drok la ioh kem ha ka jingtalasi ia ki Bos Night Super ha ka step 8 tarik mynta u bnai ha Lumshnong East Jaintia Hills.Kane ka jingtalasi ia ka Bos ka dei hadien ba ki Pulit ki la ioh khubor ban don ki briew kiba wan pynpoi drok na ka thain Silchar, Assam sha Guwahati.
Hadien ba bat ia ka Bos, ki Pulit ki ioh kem ia kine ki briew na ki artylli ki Night Super bad na ka met jong ki, la ioh kurup ia u heroin ba la thep ha ki 40 tylli ki synduk sabon ba shongdor T. 3.6 klur nalor u ganja ba khia 9.031 kilo bad saw tylli ki mobile phone. Ki 3 ngut kiba shah kem ki kynthup u Amzad Hussain Lasker na ka shnong Rajnagar, Cachar, u Monib Hussain Basker ba na Bangram, Cachar bad u Chamir Hussain Barbhuiya ba na Silchar, Cachar.
Ki Pulit ki pyntip ba kane ka jingioh kurup ka dei ka sien kaba san tang ha kine ki 10 sngi bala leit noh.Ka jingioh kurup jingduh pynbuaid da ki Pulit ka East Jaintia Hills ha kine ki 10 sngi kala kot haduh T.15 klur.Ia kine ki 3 ngut ba dang shu iohkem la register case hapoh ka NDPS Act bad ka jingtohkit mynta kala iaid shakhmat.
