Hadien ba la ioh ia ka jingtip ba tikna lyngba ki bor pahara khappud (BSF) bad ki pulit na Ranikor, ki pulit jong ka South West Khasi Hills District ha ka miet Sngi Saitjaiñ ki la leit ban khynra ïa kawei ka ïing kaba don ha ka shnong Tilagoan kaba hap hapoh Rajai Border Outpost (BOP), Ranikor Civil Sub-Division bad ki la ioh kurup ia ka pisa kaba T.72,000/- kaba la suba ka dei ka pisa India thok (Indian Fake Currency Note). Ki tyllong khubor ki la iathuh ba ha ka por kumba 11:00 eiei mynmiet ki pulit ki la ioh ia ka jingtip na ki shipai BSF bad na ki pulit na Ranikor ba ka la don ka jingbuhrieh ia ka pisa India thok kaba bun bha ha kawei ka iing ha ka shnong Tilagoan kaba la long trai da kawei ka kynthei ba la tip kyrteng kum ka Tengdi Sangma (42 snem).
Ki tyllong khubor ki la pyntip ruh ba ha katei ka jingkhynra ba la pynlong da ki pulit, la lap na katei ka iing ia ka pisa India kaba la suba ba ka dei ka pisa thok kaba don haduh T.72,000/- kaba la pynlong ia ki pulit ban kem noh shisyndon ia katei ka kynthei ba kyrteng ka Tengdi Sangma kaba trai jong katei ka pisa, bad mynta ia katei ka kynthei la pynngat haduh 14 sngi hapoh Judicial Custody ban tohkit. Ki tyllong khubor ki la iathuh ruh ba ia katei ka pisa yn sa phah sha ka Bank ha ka sngi nyngkong na ka ban pynshisha la ka long kaba thok ne ka pisa shisha. La iathuh ruh ba watla ki pulit ki hap ban ap ia ka jingpynshisha na ka bank la ka dei ne em ka pisa thok, hynrei ki la tikna ba kadei ka pisa thok.
Ki tyllong khubor ki la iathuh ruh ba ha ka jingtohkit kaba mardor, katei ka kynthei ka la kam ba ka la ioh ia ka pisa na ki nongkhaii na Bangladesh lyngba ka kam khaii pateng jong ka bad ka la kyntait ruh mardor ia ka jingkynnoh ba ka thmu ban shalan sha India ia kitei ki pisa thok. La ioh jingtip ruh ba ka jingtohkit halor kane ka kam ka la iaid shakhmat.
