Ki bor pulit ka Ri Bhoi District hadien ka jingioh jingtip ba bniah, ha ka jingtalasi ia kawei ka trok ki la ioh ban kurup ia u ganja marijuana ba khia kumba 9 kilo bad ki la kem noh ia uwei u briew ba kynnoh donkti ban shalan ia u ne u ganja. Katkum ka jingtip ba la iohlum, la iathuh ba ha ka 21 tarik Nailur, hadien ka jingioh jingtip kaba bniah halor ka jingthmu shalan ia u ganja, ki pulit ki la pynap shrip da kaba pynlong ia ka jingtalasi ha Umsning bad ha Nongpoh.
Ha ka jingtalasi ia ki kali ha ka thaiñ Nongpoh, ki pulit ki la ioh bat ia kawei ka trok kaba don ia u number NL 02 N 2630 bad ha ka jingkhynra ki pulit ki la ioh ban kurup ia u ganja ba la song bha bad buhrieh bha ha kawei ka bynta jong katei ka trok bad ha ka jingkheiñ kyllum, u ne u ganja u don ka jingkhia kumba 9 kilo eiei.
La iathuh ruh, ba ki pulit ki la lap ruh ia ki song kiba la song thik kumba buhrieh ia u ganja hynrei haba la pyrshang ban plied ki pulit kim shem la lap eiei satia na kine ki song. Halor kane ka jingioh kurup ia u tei u ganja, ki pulit ki la ioh ban kem noh ia u wei u briew ba la kynnoh donkti ha kaban shalan ia u ne u ganja ba la tip kyrteng kum u Geramsha Boro 24 na Tezpur bad ki pulit ki la ujor mukotduma katkum ka NDPS Act.
