Ka seng Hills Farmers Union (HFU) ha ryngkat ki nongrep hynne ka sngi ki la leit ban ujor sha u Chief Executive Member (CEM) ka Khasi Hills Autonomous district Council (KHADC) bad kynnoh ba ka jingot kilo ia ki mar rep ha Iewduh ka dang bteng haduh mynta. Ka HFU bad ki Nongrep ki la dawa na u CEM ka KHADC ban tuklar halor kane naka bynta ka bha ka miat ki nongrep. Ki Nongrep bad ka HFU kila kyntu ia u CEM ba un tuklar noh mardor bad ban khnang syndon ia ka jing ot kilo ki mar rep ba wan die ha Iewduh. Ki la kam ba ki ju shah khate beit haduh 10 kilo na ka 100 kilo ki mar rep ba ki rah sha Iewduh.
Ki la iathuh ruh ba kum mynta ba u sying u lah dor haduh palat 100 tyngka shi kilo kumta ka jingduhnong ka jur bha lada shah khate 10 kilo man ka 100 kilo.
Ha kane ka jingkynduh ia u CEM, ka HFU ka la pynkynmaw ruh ba wat la ka KHADC ka la don ia ka ain ba tip kum ka Management and Control of Market Act hynrei haduh mynta kam pat treikam satia. Ka HFU ka la kam ba ki mahajon ha Iewduh kim burom ia ka Management and Control of Market Act namar ka jingshah ot kilo ia ki mar rep ka dang iai bteng. Haba kren sha ki lad pathai khubor u President ka HFU U Bah C Shangpliang ula iathuh ba u CEM ula kular ba shen ka Council kan peit ia kane ka kam bad wanrah noh ia ki kyndon (Rules) khnang ba kan weng noh ia ka jingeh jong ki nongrep.
“Na ka liang u CEM ula dep ban kular ba mynta u bnai hi kin pyndep ban pyndep noh ia ki rules na ka bynta ban pyntreikam pura noh ia kane ka aiñ. Kumta ngi khmih lynti ba naduh u bnai ban wan kane ka aiñ kan sa treikam pura noh,” la ong u Bah Commander.
