Ka jingkhot hajir ia ki dkhot KSU da ki bor pulit ha ki Police Station bapher bapher ka Jylla ka dang bteng haduh hynne ka sngi na ka daw ba ki leit khynra ia ki bar Jylla ba wan rung beaiñ shapoh ka Jylla ban trei ban ktah khlem ki kot ki sla ba biang. Hynne ka sngi ha Amlarem Police Station ruh la shah khot hajir ki dkhot KSU ba kynthup u President KSU West Jaiñtia District u Laitphar Syngkrem bad u President KSU War Jaiñtia Circle u Lop Khonglah namar ha kane ka district ruh ki la iaid shakhmat ban khynra bar Jylla.
Ha ka por ba leit hajir kine ki nongialam ka seng la synran lang ruh da ki dkhot ka West Jaiñtia Hills District bad ki dkhot ka War Jaiñtia Circle
Hadien ba mih na Police Station u President KSU West Jaiñtia District u Laitphar Syngkrem u ong, jingshisha dei ban khot hajir ia ki contractor namar dei ma ki ba wanrah bar Jylla sha ka jaka jong ngi khlem biang ki kot ki sla, hynrei pynban la khot hajir ia ki dkhot ka seng.
U ong ruh imat kane dei ka buit jong ka sorkar ban pynpjah ne pyntroiñ ia ka seng halor ki mat ba ka la iaid lynti. Hynrei u ong katba nangshah pyntyrha katta ma ki ruh kin nangbteiñ khynra bar Jylla, bad kin ym shongthait hi ruh kat bym pat ioh ia ka aiñ iada jaitbynriew khnang ban shngaiñ ka pateng, ba kynthup ban pyntreikam ka sorkar ia ka MRSSA bad pynioh iaka ILP.
Shuh shuh ula bynrap ba kane ka jingleh kam dei kaba beaiñ, hynrei dei naka daw bym treikam ka sorkar kim banse ban leh da maki.
Namar wat ka check gate ba pynieng ha Umling na ka bynta ban khynra ia ki bar Jylla ruh ka shuh kylla ïing jah.
